尋晚，我同老公有飯唔食，八點前係屋企擺好個陣，每人枱前一部電話加一部電腦，我倆坐定定等iPhone 最新型號手機開售！我同老公都係Apple 用家，我哋手上既iPhone都係舊款，用咗好幾年。近呢幾年，當Apple 推出新手機，我都非常心動，好想即刻換新機，但每次都被老公ban左。佢既口頭禪就係：「Apple 年年都出新機，今年果部無咩特別，加上你部機又好地地，等出年先換啦！」如是者，一年復一年⋯⋯終於，今年輪到老公按捺不住想換機啦，所以佢不停問我：「你想買邊部？」（大家千祈唔好諗多咗，佢無諗住買俾我。如果我想換手機，我要真金白銀俾錢買！我依家係低收入人士，部部iPhone 都成幾千蚊至萬幾蚊不等，我真係要諗過度過囉！）今時唔同往日， Miss Mean 依家絕對唔容許自己衝動消費，永遠理智行先！每次我想買野，我都會要求自己諗三個非買不可的理由。到目前為止，我淨係諗到一個換機理由，就係影相靚啲。簡單而言，我仲未說服到自己換手機。（無計啦，鬼叫我咁窮咩！）不過，見到老公興致勃勃買電話，我又怕蝕抵，所以忍唔住搶埋一份，皆因我諗住絕地一博，臨老學人炒賣iPhone！不過，我始終都係初哥，唔敢博得太盡，所以我都只係買咗一部iPhone 15 Pro Max，希望炒得起啦，否則「賠了夫人又折兵」⋯⋯ (以前的我，搶到新iPhone，當然第一時間拆箱自用，正所謂「早買早享受」，我完全不屑炒賣。點知依家既我，180度改變，果然貧窮係會改變一切！）言歸正傳，尋晚搶買iPhone 過程都幾緊張刺激。踏正八點，我哋不斷refresh browsers 同埋 Apple store apps。 過了好幾分鐘，我哋都未能成功進入系統，我仲一心打定輸數，點知我手機上既Apple store apps 突然成功進入購物版面，仲要係9月22號門市攞機！頭淡湯喎，我當然九秒九撳掣，然後俾錢！（果刻我完全無諗過幫老公買多一部手機，好彩最後佢都成功買到心頭好，否則佢一定不斷怨我。）當老公成功買到新機後，佢又心思思想買多一部Pro Max，但卻猶豫不決，於是問我意見。我理智地回應他：「部手機炒唔炒得起無人知，萬一真係炒唔起，我果部會自用，但你到時有兩部電話，點算？我就take 唔起呢個 risk，所以我由始至終都淨係諗住買一部機。」最後，佢都只係買到一部手機，因為他真係諗得太耐，Pro Max 唔等人，賣晒啦！（Miss Mean 格言：Trust your gut. )當晚老公開始上網搜羅手機殼及屏幕貼，心情非常興奮，他甚至問我需要甚麼手機殼。在老公眼中，我最後會唔捨得割愛。老實講，我唔知當新機到手，我會唔會「打倒昨日的我」，我只知呢一刻我異常平靜，沒有絲毫期待感。下個星期五，Miss Mean 就會去Apple 門市取機，究竟我部新機何去何從，到時揭曉，大家拭目以待！
