Miss Mean 呢排黑氣纏身，繼早前左顎一夜間變得又腫又痛，幸好食完抗生素後，發炎的地方都消退了。尋晚臨瞓前，我的右膝附近毫無先兆拉傷，我都唔知係拉傷條筋定肌肉，總之依家行幾步都隱隱作痛。點知我的黑氣仲未散去，頭先食乳酪時，我食到最後發現口裡有異物！OMG！咬落去感覺似紙巾/紙皮，吐出來看，灰灰黑黑，我都唔知係咩野。Anyway, 我希望唔會絞肚痛⋯⋯ 講起黑仔，Miss Mean 真係世界級，鑊鑊新鮮鑊鑊甘，為我平凡的生活泛起陣陣漣漪，連老公都嘆為觀止。1.食物「加料」我對食物衞生有著很大的執著，所以我好少補襯小店，通常光顧大集團/連鎖店，但我都係照樣出事。記得有一次我買咗個粟米肉粒飯，雜菜上夾雜著一隻蚊滋，我嚇到將整盒飯丟掉！呢件事算小兒科，最震撼的一次，我在公司食了一半焗豬扒飯，我才發現原隻蟑螂在焗飯內，我嚇到立刻把口裡的食物吐了出來。周邊的同事有些叫我影相報食環處，有些叫我將盒飯拎返餐廳退換，我完全無意欲做任何野，我只係想快啲忘記呢段黑歷史！自此之後，我有好一段時間blacklist 該餐廳，而且我對焗豬扒飯產生極大的陰影，別人只要一提起，我都handle 唔到！2.無啦啦整親我絕對係一個「容易受傷的女人」，每日唔係整傷呢度，就係拉傷果度，跟住又要休養一排。有時候，真係唔關我事，我係受害者。我同老公既睡姿不相伯仲地差，我哋會係夜闌人靜時互相「廝殺」而不自知。老公身型係我兩倍，佢既無情力經常令我受傷，一個批踭或者膝頭稍為郁下，我都可以痛到叫起來⋯⋯兩星期前一個深夜，我就係睡夢中驚醒，因為我的左面頰被人打了一拳！我一邊摸著自己疼痛的面頰，一邊搖醒身旁沉睡的老公，生氣地問他：「做咩打我？好痛！」老公半睡半醒地回答我：「我發緊夢⋯⋯」我仲可以點？唔通打返佢一拳？當然小心護著自己的面頰繼續瞓覺⋯⋯希望Miss Mean 既黑仔事件簿唔會有續集，完。
