剛剛經歷完強烈颱風蘇拉，無諗到咁快就黎一個世紀黑雨，令全港多處嚴重水浸、交通癱瘓，威力驚人！尋晚瞓覺前，天文台發出黑色暴雨警告信號，我當時仲諗第二朝應該雨過天晴，大家照常返工返學，而我就打算去麥記嘆個早餐。誰不知，今朝差唔多天光，老公在床上開始不斷check 手機，他的動靜怎可能逃過我的耳目，我當然要關心關心他。Miss Mean：依家幾點鐘？（大佬，半夜三更，你仲咩有覺唔瞓，係度玩電話⋯⋯）老公：五點半⋯⋯ （嘩，因咩事咁早起身？）Miss Mean：發生咩事？（我即管睇下你有咩大事要急住處理。）老公：外面好多地方水浸，巴士停駛了。 （嘩，咁大劑！）Miss Mean：咁點算？（連巴士都要停駛，外面情況應該好惡劣，咁咪繼續瞓覺。）老公：唉，早知尋日拎埋部電腦返黎。我今日要早啲起身搭地鐵返工⋯⋯（咩黑雨唔係要留係安全既地方？仲要早啲起身返工？）Miss Mean：哦，咁你快啲瞓多陣。(香港精神：水浸都要返工，respect！) 當我起床時，老公已經係公司開緊工啦，他不忘叮囑我要留在家中，不要周圍走。我唯有乖乖地係屋企飲奶食cereal⋯⋯（Oh no，我好掛住杯麥記奶茶，同埋豬柳蛋漢堡。）中午時分，我有啲口痕，想搵啲零食過下口癮，我先發現屋企既乾糧被人洗劫一空！我盒黑朱古力，唔見咗！我果罐即飲南瓜湯，搵唔到！我食剩半包既薯片，都唔見埋！簡單來說，本小姐想食既野，全部憑空消失了！我的心情跌到落谷低，即刻text 老公，他回了我一張相片，只見我的零食整整齊齊出現在他的辦公桌上！原來，老公今朝將屋企既乾糧帶曬返公司，以防餐廳唔開門。我極度無奈，唯有自己開火煮野食⋯⋯經此一役，我才體會到「不測風雲」最可怕，因為大家都無預先準備，往往被殺個措手不及。OK，我會去超市買定一大堆乾糧，下次打風落雨都無有怕。老公，你負責埋單！
