Miss Mean 除咗送外賣，我有時都會返下其他兼職，就係去展覽會做下攤位助理 (Booth Assistant)。係呢半年，我返過兩個展覽會咁大把。無計啦，展覽會通常橫跨幾日，要全期返到工，對我黎講確實不易。（本小姐貴人事忙，又要覆診、又要忙著到處旅遊，都幾難夾時間。）每次返展覽會，我都係全日工作，朝九晚五，狂踩幾日，個人都幾累。累的原因不外乎唔夠瞓、無啖好食、要長企等等。話雖如此，我都幾鍾意呢份工：1.我本身喜歡行展覽會，返工期間可以免費入場，我又可以順便周圍逛逛，寓工作於娛樂，正呀。(不過，我唔係次次都有時間周圍行，要睇彩數。）2.我好喜歡結交五湖四海的朋友，一邊返工，一邊吹水，時間都過得快啲。（只限於工作期間，放工後唔好搵我！）3.展覽會很多外國人及中國人，我可以乘機練習下英文、普通話，正所謂 Practice makes perfect。（屋企啲小朋友個個都係native speaker，我輸成條街，望塵莫及，真係要加緊練習。）4.人工按每小時計算，「一分耕耘，一分收穫」，出糧最開心。（千祈唔好同以前份人工比較，無比較，無傷害。）5.返工可以嘆免費冷氣。（炎炎夏日，屋企熱到飛起，但我無可能24小時開冷氣，所以我一定要物色絕佳的避暑山莊。）呢份工忙唔忙？問得好！一份工忙與否，視乎你被安排到邊個攤位幫手，好睇你命水。有些攤位好好生意，人山人海，工作人員當然忙到無停手，水都唔得閒飲、廁所都唔得閒去。有些攤位則無人問津，工作人員好梳乎，有啲打緊機、有啲溝緊女，有啲甚至瞓緊覺。返工可以hea 到咁，Miss Mean 都大開眼界、嘆為觀止。（老實講，我都幾羨慕佢哋，返工可以零壓力，我自問做唔到。受人錢財，替人消災，我點都會扮下工，交下戲，話囇我係專業，唔好當我流！）講下講下，Miss Mean 心思思想返工，等我又搵下工先！
