自從2018年經歷完颱風山竹，Miss Mean 真心怕咗打風，我完全無諗到打風可以令大廈搖晃，當時嚇到我直接離家出走！現在回想起來，我仍然心有餘悸。今次颱風蘇拉來勢洶洶，全城戒備，人心惶惶。Miss Mean 生人唔生膽，當然繼續心慌慌，我唯有搵野忙，distract 下自己。打風前一天的準備功夫：1.睇咗醫生，確保自己有藥食 （詳情可以細閱上一篇文章「藥罐子」）2.食完晚飯，我和老公如常經過屋企樓下的便利店，我倆發現千年難得一見的奇景，就是排隊付款的顧客竟然排到出便利店門口！老公見到人龍，嚇到掉頭走；而Miss Mean 唔執輸，當然留低血拼。最後，我掃了一袋東西回家，有餅乾、豆漿及豆腐花。（返到屋企，老公不斷抱怨我買貴嘢。你識咩呀？羊群心理，人買我買，Miss Mean 買嘢都係為求安心。）打風日之暴風雨前夕（八號風號）：1.到超級市場作最後衝刺，買了雞蛋、娃娃菜、雪芳蛋糕及鮮奶，滿載而歸，大滿足。(我發現不少市民跟Miss Mean 一樣臨急抱佛腳，八號風號先黎儲糧。幸好，超市職員不斷將貨物上架，所以我唔使搶都買到心頭好，Yeah！）2.杞人憂天的我擔心今晚會停電，老公當然為此作萬全準備！手攜式風扇、尿袋、電筒，全部都叉足電，以備不時之需。（老公真係好重要，尤其當我手騰腳震既時候，佢完全可以支撐大局。）3.沖好涼，避免大風大雨開唔到抽氣扇及熱水爐。4.預先下載好幾套電影、電視劇，以防暴風雨下無得上網。（十號風號預咗係屋企困戰鬥，唔好講笑，娛樂真的很重要。）當Miss Mean 忙裡忙外為十號風號作準備，老公其實仲未收工。自從有咗Work From Home 後，邊個話打風一定有假放？以老公為例，即使八號風球，公司啲嘢都係排山倒海，too crazy！諗起都覺得大壓力，我都係繼續享受一下暴風雨前的寧靜⋯⋯
