一年前的Miss Mean雖然未至於高薪厚職，但至少收入穩定，完全唔需要憂柴憂米。我甚至覺得咁辛苦返工，當然要好好獎勵自己，想買就買、想食就食，我完全係唔會考慮價錢。再加上本小姐愛錫家人、為人豪氣大方，請屋企人飲飲食食更是家常便飯。（如果時光倒流，我應該會變得自私啲、小氣啲，等自己可以多個錢旁身。）為人疏爽不是問題，Miss Mean最大的毛病係對數字極度唔敏感，完全沒有理財的概念！最誇張的是，以前的我連自己銀包或者銀行戶口有幾多錢，我都唔太清楚。現在回想起來，我真的很痛恨自己浪費了許多寶貴的光陰及金錢！（如果能夠回到過去，我一定會好好理財，為自己打造被動式收入，未雨綢繆。）現在的我，開工量明顯不足，大多數時間都係過著退休人士生活。既然「開源」能力有限，我唯有好好「節流」。以下是Miss Mean 既獨門慳錢大法：1.告別酒肉朋友身邊的朋友個個都有返工、有收入，對佢哋黎講，食餐飯、睇齣戲，簡直濕濕碎啦！但對我嚟講，一日之內花幾百蚊，我真係好肉痛！呢啲酒肉朋友，Miss Mean依家盡量敬而遠之。（如果大家諗住請我食飯、睇戲，我一定奉陪到底！）2.回歸簡樸生活剪髮，No! 化妝，No! 買新衫、新鞋、新飾物，No No No! Miss Mean一直以來以短髮示人，平均每三個月都要修剪一次。為了慳錢，我決定留長頭髮，相信一年半載都唔需要再去髮型屋喇！依家都唔使點見人，我完全唔需要化妝或者換季。再加上化妝品係化學品，對身體亦無益，倒不如素顏上陣。（老老實實，我又唔係明星，即使我日日素顏、著同一套衫出街，都唔會有人care!) 3.盡用屋企資源屋企有既野，就用左先，千祈唔好自己另外花錢買。屋企既然有牛奶、面包，為何不留在家中食早餐？咁又可以慳返一餐，小數怕長計，Miss Mean盡可能謝絕一切不必要的開支。（話晒我以前係屋企貢獻良多，依家只不過攞返我應得嘅，你唔係同我計嘛？) 4.格價、格價、再格價作為一個精明嘅消費者，買任何嘢之前，一定要三思及格價！三思而後行可以杜絕所有衝動式消費；格價就確保唔會買貴咗而飲恨。Miss Mean依家深知金錢得來不易，所以特別珍惜每一分每一毫⋯⋯（唉，早知今日，何必當初？）馬死落地行，我認命！順天而行，順命而為！
