一直以來，Miss Mean都無叫外賣既習慣。至於各大外賣平台，我都只係試過「外賣自取」，貪佢有優惠券。（本小姐無咩耐性，肚餓無野食，我必定大發雷霆。求人不如求己，與其等外賣送上門，倒不如到餐廳自取，或者索性係餐廳食埋先走。）正正因為我無咩用過外賣平台，所以我對於果幾間公司無特別既情意結或喜好。當我要申請做外賣員的時候，我都係單純睇下邊個平台自由度最高，容許我隨時上線下線。作為外賣新丁，正式開工前，我有詳細熟讀所有公司提供的培訓資訊，確保自己唔係「一張白紙」。事與願違，我第一次開工，我連個外送專員手機app都唔知點用⋯⋯（外賣員開工離不開專用手機app，點解公司唔投放多少少資源，拍條片教下新手點用個手機app呢？）第一次開app上線，Miss Mean 戰戰兢兢，心情極度緊張。幸好，老公陪我一齊出動，否則我一定handle 唔到。當日我好快收到第一個訂單，但我唔識睇送餐地址，我淨係見到餐廳地址。Anyway，我係唔知去邊既情況下，我就接左一生第一個外賣訂單。根據手機app上既地圖，我們順利去到餐廳取餐，並於餐廳門口成功按下「已取餐」，而送餐地址終於再顯示出來，乃是某住宅大廈，幸好與餐廳相隔不太遠。大約十五分鐘後，我們終於到達該住宅大廈附近。老公：邊有兩個人一齊送外賣，我唔上去啦，你自己上去，我係樓下等你。（你講真架？我有啲怯。）我：無問題，你係度等我，我有事就打俾你。（如果真係出事，我仲打到俾你？）於是，我咬緊牙關、頭也不回帶著外賣進入住宅大廈。進入大廈後，保安盡責地幫我進行登記，然後放我上樓。我一出電梯，我就忙著找門牌號碼，因為我好怕自己弄錯單位！核對了幾次地址後，我終於鼓起勇氣去按門鈴。一位女士隨即開門，她很快接過外賣，然後對著我講了兩個數字。我腦海一片空白，完全不知如何應對，我只係識答「下？」那位女士顯得有點不耐煩，她又重複了那兩個數字，然後關上大門。門外的我呆了一刻後，終於識得望一望手機app。哦，原來我要輸入一個代碼才可完成訂單，難怪那位女士自動自覺報上來，佢應該係外賣平台既常客。（真係唔怪得我，我第一次開工，一來無經驗，二來公司又無教我點用個app。)我快速將代碼輸入到手機app上，成功完成人生第一個訂單！我急不及待離開現場，第一時間與老公分享外賣交收實況。（我再唔落去，我驚老公會報警，畢竟我係樓上待了好一段時間。)總結：第一次送外賣，我的表現確實有點雞手鴨腳，但總算有驚無險完成任務。Mission completed！
