Miss Mean 深信呢個世界除咗我的奇葩老公會建議我做外賣妹外，應該無人會鼓勵我去嘗試呢個工種。（老老實實，我本人都唔會突發奇想諗到踏足外賣平台市場，因為份工好似不太符合本小姐纖纖弱質、斯斯文文的形象。No offense.）關於送外賣，當時我實在沒有思考太多，我的腦海只簡單浮現了以下想法：1.份工感覺很自由，幾時開工、幾時收工由我話事，無壓力。2.屋企附近返工，交通費都可以慳埋，正呀！3.送外賣當做運動，仲可以賺下錢，一舉兩得。因此，我好快就係某個外賣平台申請成為步兵。不過，申請需時，Miss Mean 等左約一個月先正式開工。當我成功加入外賣平台後，我急不及待跟媽媽分享這件「喜事」，但佢嘅反應我係意料不及⋯⋯媽媽：點解咁多野唔做走去送外賣？我： 份工夠自由，我鍾意返工就返工、放假就放假，又可以當做運動，幾好呀！（我鍾意呀，吹咩！）媽媽：你係大學畢業生，又係社會做咗咁多年野，仲咩同人爭飯食？我：今時唔同往日，大病之後，我的狀態差左好多，工作能力暫時未能回復以前的水平。（我一出世就同人爭緊，爭學位、爭工作、爭升職⋯⋯無計，呢個社會係咁運作。況且，我又唔係伸手問你攞錢，你仲咩咁大反應？）媽媽：送外賣碰到熟人點算？我：碰到熟人有咩問題？我又唔係作奸犯科、打家劫舍，送外賣係正當職業。（如果碰到熟人，咪大大方方say個hi，然後再say個bye，唔通繼續吹水？唔好玩啦，本小姐好忙，仲要趕住接下一單，唔好阻住我搵食。） 媽媽：送外賣咁失禮，你老公會嫌棄你！我：放心，老公建議我去送外賣的，而且每次佢都陪住我，佢甚至比我更加雀躍，成日捉我開工。（老公思想開明，先唔會同你一般見識。外賣員係用勞力換取金錢，respect, respect, respect！） 經過幾番唇槍舌戰，Miss Mean 完勝，媽媽自此再無發表任何意見。我當時確實有些生氣，我明白她的言下之意係我失禮佢，令佢沒有面子。Anyway, I don't care! 我唔會再迎合別人而生活，想做就做！俗語講得好：「職業無分貴賤，行行出狀元」。有Miss Mean強勢加盟外賣平台，外送團隊的服務質素必定大大提升！公司係咪應該考慮加我人工呢？
