一年前，Miss Mean 不幸患上癌症，因此離開職場接受治療。（關於呢段黑暗日子，我就唔多講啦，免得大家要攞紙巾擦眼淚。）最重的是，一年後，我總算活過來，可以漸漸回復正常生活。不過，現在的我，狀態已經不勝當年，重返職場當女強人絕無可能。（經此一役，唔通我仲辛辛苦苦捱騾仔？我唔想有錢無命享呀！）現實終歸是現實，Miss Mean 並非含著金湯匙出生，亦都唔係咩千億新抱，我背後無一座金山backup。我只可以向現實低頭，開源節流，穩穩地守住我僅餘的積蓄，有精力咪接下part-time job，賺些零用錢，令自己生活不至於那麼「拮据」。（依家唔再做大花筒，慢慢學習理財。）話雖如此，Miss Mean 現時接job都幾揀擇，我會仔細考慮以下範疇：1.工作性質要輕鬆、唔可以太大壓力 （如果part-time job都咁辛苦，咁我點解唔正正經經搵份長工？）2.工時合理，作息平衡（工作唔係一切，Work-life balance先係王道)3.報酬合理（話晒我係職場打滾左10多年，經驗豐富，請到本小姐絕對係貴公司執到寶，壓價免問。）4.自由度高（我可以自行選擇幾時返工、幾時放假，真正主導自己的生活）5.自己對份工感興趣（人生時間有限，點解要委屈自己做啲無興趣既野？）正正因為我太揀擇，我的接job量不高，大多數時間都係放假狀態。大約兩個月前，老公見我足不出戶，佢應該擔心我屈出病，所以佢半開玩笑同我講「反正你係屋企無野做，不如出去送外賣，順便行下啦！」一言驚醒夢中人，外賣平台呢個新興行業聽就聽得多，究竟佢係點操作？我好想好想揭開呢個行業的神秘面紗，親身體驗一下外賣員的工作。於是，我興致勃勃上網註冊成為某外賣平台的步兵。（唔知係咪太多人申請，我等左起碼一個月先有回音，當初那團火都就快燒完⋯⋯幸好，隨後的登記步驟相對算快，Miss Mean 終於可以係外賣平台市場大展拳腳！）Miss Mean 來了！Are you ready?
