Miss Mean 趕上潮流，加入近年新興的行業— 外賣平台當外送專員。外賣平台名稱：唔透露（因為我唔會免費幫佢做宣傳，除非佢肯俾廣告費，咁就另當別論）職位：步兵，日行萬步去送餐年資：剛滿1個月 返工時間：睇心情，但基本上要符合以下條件我先開App接單：1.太陽落山後 （本小姐怕熱又怕曬，最驚中暑）2.天朗氣清，落雨必定唔開工 （天雨路滑，仲要拎住外賣，好危險啫，我唔會搵命博）3.最好食飽晚飯（開工當散步，順便賺點外快，何樂而不為？）開工長度：每晚平均1小時 （Miss Mean 格言：Work-life balance)接單量：每晚平均一單（無計啦，呢排無咩單，唔通外賣平台咁快玩完？）收入：平均$30一單（傳聞送外賣會發達？我諗無可能發生係我身上）小費：可遇不可求，我都係收過兩次咁大把 （大家下次識做啦！）開工Look：自行配搭型格運動裝束，目標係要做最時尚的外賣仔（公司有提供T-shirt及風衣俾外賣員，但係件件都Oversize，搞到我好似小朋友著大人衫，大佬我點著出街呀？）開工排場：Miss Mean出動，有跟班隨行是基本吧。（邊個咁抵得諗？當然係我既跟得老公！係佢眼中，我永遠都係隻手無縛雞之力的小綿羊。Miss Mean 送外賣等於送羊入虎口，佢當然自動請纓充當我的人肉GPS、保鏢，以及大力士。）開工三寶：1.自備樽裝水（每晚行到身水身汗，我都係賺得幾廿蚊，唔通轉個頭走去便利店買野飲，咁我果日真係白做！）2.運動毛巾（乃係我時尚造型配搭的一部分；但係對我老公而言，運動毛巾係必需品，因為佢真係超誇張，送個外賣好似去做健身，成件T-shirt 濕透，我真心懷疑佢係水做的。）3.有相片的證件（外賣員出入屋苑要做登記是常識吧，但我絕對唔會出示身分證囉，我必定隨身攜帶其他替代品，你吹我唔漲。）作為外賣仔新手，邊個可以招積過Miss Mean？我認第二，應該都無人敢認第一。
