大家都話生完要好好休息，但我出院之後第一星期係完全冇得休息的⋯⋯ 出院後第二日，BB去咗健康院檢查發現有黃疸，健康院嘅醫生就即刻轉介佢返去醫院，BB當晚又入返院了😅而我同一日就喺會陰傷口未復原，行一步都痛，坐低又痛的情況下健康院醫院兩邊走。 第二日，知道BB未出得院就喺屋企泵定足夠份量嘅人奶送去醫院，夜晚再同老公去探一次BB。佢幾時出得院？ 醫生話要再觀察多一日，第三日又重複泵奶—醫院—屋企。BB住咗兩日院，好好飲奶，黃疸指數終於回復正常，可以返屋企了。 BB結束咗醫院嘅生活，原來已經一星期，我亦都開始真正嘅坐月—足不出戶。 第二個星期先開始有攰+傷口痛的感覺，每日除左泵奶食飯，大部分時間都訓床。本來以為坐月無所事事，但原來太攰係真得需要好好休養，就係要無所事事多休息。 由於精神太緊張，又要不停起身，入睡都會發惡夢，最後去左睇中醫調理，食左5日安神藥先慢慢無夢地入睡。同一時間，身體亦都開始不停出汗一日換幾次衫幾條毛巾，原來係產後正常的生理表現。呢度提議大家可以著吸汗快乾嘅運動衫🎽感覺會更加舒適。 大家記住要保持輕鬆嘅心境、好好進食、多飲水、勤按摩，先會多奶架。
