韓國，別稱「泡菜國」。國如其名，韓國人最常食的食物，一定是泡菜。亦因如此，很多人都以為韓國食物很重口味，唔係辣就係酸。其實，這裡有很多泡菜以外的味道，等 MJ 帶路教你搵食啦！ 1. 雪濃湯 （설농탕 ） 雪濃湯係我大部份韓國朋友最喜歡的韓食，貪其鮮味甜美和恢復元氣的功用。韓國有數間雪濃湯的連鎖店，最受歡迎的係「神仙雪濃湯」（신선설농탕），差不多每一區都有一間。遊客可去去明洞店、弘大店（弘大站 1 號出口）光顧。 雪濃湯奶白色的湯汁由牛骨熬煮而成。對牛骨湯的要求，韓國和香港大大不同。香港追求的牛骨湯係「清湯」，顏色偏向透明，味道講求鮮甜。韓國人要求牛骨湯的顏色是奶白色，表示牛骨內的精華與湯汁融為一體。 雪濃湯的味道比香港清湯腩的湯底更鮮美濃郁，有點接近牛奶的味道，令日一試難忘。雖然店裡有鹽和胡椒粉供應，食客可自行調品，但 MJ 覺得原味味道已經非常完美，不需要畫蛇添足。 味道：冇得唔試 價錢： 7,000 won ( 約 HKD＄50 ) 食法：隨湯付上一碗白飯，可將整個白飯放在湯裡變湯飯品嚐，亦可以用匙羹裝一羹飯，一小塊泡菜，蘸湯吃。 奶白牛骨湯內還有嫩滑牛肉，雙重美味。 2. 烤肉 韓國烤肉絕對係不能不試的韓國美食之一。旅遊書成日教遊客去食某某某明星開的烤肉店，MJ 覺得明星店的味道與普通食店差不多，但價錢卻貴很多，所以不建議去。 想食抵食的烤肉，去弘大區係一個蠻好的選擇。這裡有超過50間形形色色不同的烤肉店，要最傳統的、新潮食法的，都應有盡有。 MJ推介大家搵間露天開揚的烤肉店，一來烤肉的味道可以較易揮發，二來可以一邊食一邊欣賞弘大區的夜生活。位置揀得好的話，有時仲可以睇到聽到弘大的街頭表演。 通常在韓國食烤肉都係叫得越多價錢越平。如圖中的五花腩，一份（兩塊）要11，000 won , 叫三份以上每份價錢只要7，700 won 。 所以搵多啲朋友一齊去食烤肉就可以食多啲同食平啲！食烤肉通常會附送泡菜和蔬菜，有些店會加送白飯和湯，但大部分都要另點。 MJ 推介的烤肉店在弘大站 9 號出口附近，配食有泡菜、新鮮蔬菜、味道近似泰式木瓜沙律的前菜、蒟蒻凍湯、焗蛋，一定叫你食到捧著肚子走。 味道： 五花腩非常肥美，肉質幾 juicy，值得推介 價錢：MJ 與友人點了3 份肉，另加白飯和啤酒，價錢每人約 15,000 won （約HKD＄100 ） 特別提議：如果夜晚在弘大區享用完晚飯，可沿著弘大大街散散步，觀看街頭的歌唱、跳舞、魔術等表演，保證你有意外驚喜。 一到夜晚，弘大大街就會有好多年青人表演才藝。對比香港旺角行人專用區盡是被強國遊客和強國大媽霸佔，我只能說「香港加油」。 3. 血腸 血腸（순대）是韓國常見的街頭小食，通常分為蒸血腸和辣炒血腸，MJ 推介的是前者。蒸血腸內的餡料有由糯米製成的粉條和豬血，意外地一點豬血的腥味都沒有，而且口感煙韌獨特，是香港沒有的韓國專屬美味。 味道： 冇得唔試！！！ 配料：通常老闆會附送幾塊豬雜內藏如豬潤、豬腸，另有一杯魚糕湯 食法： 可蘸碟邊的鹽一齊食 價錢：約 3,000 - 5,000 won ( HKD$ 30 - 35 ) 攤檔通常都會將原條未切的血腸擺放在客人面前，供客人選擇。 4. 煎綠豆餅 ／ 肉餅 有睇開 Running Man 的朋友對韓式的煎餅應該唔會陌生，但正確食法你又知唔知係點？ 煎餅雖然係街頭小食，但你一定要坐低在食店內慢慢食，先可以明白點解韓國人如此喜愛佢。首先，點完煎餅後，唔好比老闆走住，要老闆幫你寫多枝「Makgeolli」( 韓式米酒），你先叫做完成點單。 點解要Makgeolli？因為煎餅的正確食法係要將餅分成小塊，然後每塊餅塊上配一片洋蔥或泡菜擺入口。由於洋蔥和泡菜都是刺激味蕾的食物，所以要配一碗甜甜的米酒中和舌頭刺刺麻麻的感覺。 韓國人有下雨天食煎餅的習慣，因為可以一群朋友圍在一起食餅把酒聊天，係聯誼的好方法。 味道：食煎餅味道往往不是重點，因為食完你都係分唔清邊一個係綠豆餅，邊一個係肉餅。反而，感受 Makgeolli 與煎餅的微妙配搭，才是重點。 價錢： 酒＋餅 約 7,000 won （HKD ＄50 ）
