其實編輯嘅枱面同一般OL一樣，不外乎電腦、文具、月曆、水杯、Hand Cream、擺設、盆栽…… 不過做得呢一行，都總係問題多過人，少幾樣嘢都唔得！ 眼藥水 記者篇稿洋洋灑灑千萬字，一日睇幾篇，點會唔癲？每日對住電腦6至7個鐘，對眼又乾又澀，紅筋爆晒出嚟，每個編輯都總有一支眼藥水喺左近！ 撒隆X斯 Baby，一日坐足7小時，對住電腦「啪啪啪」（唔好心邪囉），啲筋骨想鬆鬆都唔得，腰酸骨又痛，如果冇咗撒隆X斯，我驚我過唔到明天！ 易極薄荷糖 呢個簡直係起題嘅繆斯，每次腦閉塞啪一粒，包你文思如泉湧，即刻「叮」一聲有晒Idea！除咗醫腦便秘，佢仲要係興奮劑，如果改稿改到想瞌眼瞓，食一粒超勁薄荷味，包你醒過劉醒！ 熱水壺＋凍水壺＋水杯 編輯枱面絕對係一個Pantry嘅縮影，皆因忙起上嚟想去個廁所都冇時間，又何來時間去Pantry？所以裝水器皿絕對要三個，冷、熱水齊晒，隨時都飲得！
