相信大家定咗婚期後，第一件諗嘅事就係～影婚紗相！ 我同男朋友本嚟諗住去香港婚展會睇吓啲對戒～ 點知俾個台灣攝影師游說咗去聽吓佢哋個婚攝～ 一坐，就係三個鐘。 雖然佢哋嘅銷售技巧唔太好（有啲煩） 但眼見佢哋影嘅相都幾靚，價錢ok，而且又係我好鐘意嘅台灣～ 所以就碌咗卡俾錢～ 盛惠$8000。 包40組相片、洞洞海報（勁廢，完全唔知要嚟做乜）、摩天輪、超大本相冊X1、油畫、簽名冊（唔包去台灣嘅酒店同機票） 好蠢地，我哋俾晒錢先識上網搵評價。 一望，大獲，好似好壞參半喎！ 係咁見啲人話去到好多額外收費架blablabla~ 都咪話唔驚呀～ 卒之等到上年11月去台灣影相。 影之前一日要去店面見吓攝影師同負責人， 最終我哋㨂咗淡水嘅婚攝場地， 知道要額外俾入場費、泊車費，加埋都okay嘅～ 再傾埋拍攝時間，我哋就返去好好休息吓，準備第二日Chur全日嘅行程啦！ 第二日晨咁早我哋就去咗化妝， 一路化先知，原來個化妝師係唔跟出去架～ 如果要佢跟，咁就又係要加錢啦～ 同埋大家記得要自己帶精華液， 因為佢哋為咗可以定妝，如果你自己冇帶，就會要求你加$500台幣買架啦～ （男女都要架） 個化妝師嘅化妝用品我覺得望落去唔係十分乾淨～ 但化妝技巧Okay～ 亦都有親自整花環俾我戴上頭～都幾靚架！ 大約坐咗個零鐘車就去到淡水婚攝場地。 當日連埋我哋大約有四對新人拍攝。 果日陽光超好，影室外景好靚～仲有海灘添！（海灘影日落一流呀！） 然後我自己淘寶買咗啲汽球～喺場地要泵氣要加錢，大約$60台幣一個。 點擊圖片放大 +4 室內景都好靚～ 成個婚攝場地好大～ 行幾步就可以拍到完全唔同風格嘅場景！好正！！ 雖然有某啲場景嘅物品望落去有少少殘～ 但因為一個地方可以影到好多唔同風格， 同埋可以後期修圖～ 所以最後成件事用港幣一萬蚊鬆啲賣單， 我哋兩個都覺得好抵。 不過重頭戲當然就係第二日揀相啦！ 大家要有心理準備要同婚攝果邊對戰長達4小時 又原來40組相片係等於40張hard copy相同40張soft copy相～ 初初我哋誤會係total 可以㨂80唔同嘅相 當我一路喺度篩走啲相～ 對方就會開始有啲黑面話「這張也不要嗎？」「拍不回來了啦～別刪」 然後我猛話我冇錢啦～好窮呀～ 最後佢開我價$1000台幣賣一張相俾我～ 我屎都唔加錢～ 由下晝1:00搞到下晝5:00～ 終於可以全身而退$1都冇蝕俾佢 大家記住要企硬呀！ 㨂掂晒啲嘢之後，佢哋會email你㨂啲相嘅soft copy俾你～ 問你邊啲要執（要問清楚執邊啲要錢呀） 而最大問題就係你點拎返果堆咁重嘅油畫、大相簿之類。 由於我有家人喺台灣住～所以相簿同油畫就由佢哋幫我Keep～ 否則大家有機會要飛多轉台灣或者承受郵寄風險！ 總括嚟講～出嚟個效果都幾好～攝影師影得都幾靚，後期修圖都自然嘅～相簿質素高～只係揀相果方面較煩～覺得大家如果想影多啲景色，都可以試吓去台灣影呀～幾有驚喜嘅！ 總共金額：大約HK$10000 建議： 1.如果有相熟嘅新娘秘書（啫係跟住出去影相嘅化妝師，可以自己出去book。 2.記住事前自己淘寶多啲攝影道具。
