HELLO! 大家好:) 今次我想同大家分享嘅野係同護膚品化妝品時裝一D關係都無嘅，今日想同大家講嘅係關於愛情問題，雖然自己唔算得上係專家，但係都算係有小小經歷，希望同大家分享。 首先我想講下我自己，我有一個好錫我嘅男朋友，一齊左已經8年，8年裡面頭3年都係異地戀，異地戀其實真係唔容易，情人節，生日，聖誕節都唔可以一齊過，有時都會好寂寞，但係我地都會盡量去抽時間俾大家，好多人都話異地戀唔work，其實我覺得只要兩個人都肯用心去經營，根本就唔會無可能，話唔work之前，有無諗過自己肯唔肯去付出？我記得當時放左學，其他朋友去行街食飯，我就選擇趕返屋企就係為左同男朋友可以skype一陣，而我男朋友當然亦都一樣，為左令我有安全感，佢仲寧願搬去同佢呀哥住，每日要用個幾鐘返學，我地會間唔中就寄D小禮物俾大家，有時可能只係一封信或者一包糖，但係已經係全世界最好嘅禮物，如是者，3年好快就過，從來無一刻因為異地戀而變淡，所以話唔WORK之前，諗清楚自己有無去努力過。 之後果5年同之前3年過住完全相反嘅日子，我轉左校去佢讀書果度，因為我地都係留學生，無屋企人係身邊，所以我地一齊住一齊返學，5年黎日日都見，要面對嘅問題同之前3年好唔同，以前因為可能一年都見唔到一次會好寂寞，好掛住，之後日日見反而就會擔心會唔會無左新鮮感，而且一齊住，就算鬧交都無地方可以去，當然中間都會有覺得辛苦嘅時候，所以我地會用好多時間去溝通，每次鬧完交，我地都會坐低去傾計，去講大家有咩不滿，從來唔會收收埋埋，亦都唔會當無事，訓覺之前一定要一齊去解決個問題，我地會好努力為左大家去改，有D人會話如果改左果個就唔係我啦，但係有時候去改，只係為左令自己變做一個BETTER PERSON，兩個人一齊需要互相遷就，有時佢會陪我出街，就算去到好遠，揸車揸足一日佢都唔會有怨言，相反當我知道有新GAME出，我亦都好樂意成個WEEKEND都留係屋企陪佢打機。日日見新鮮感當然會減少，但係我地會準備好多小驚喜俾大家，例如我會一早pre order一部新出嘅遊戲機俾佢，然後一出果日就呃佢車我出去，其實係去攞，我從來都唔介意佢打機，因為我覺得只要你俾佢做佢想做嘅野，佢會知道，佢下次會記得你就過佢，佢都一定會就返你，呢個係我同我男朋友嘅相處之道。當然佢亦都會同樣準備唔同嘅驚喜，因為一齊住，佢會留意到我D MASK用晒，佢會放學自己去買返俾我，對我黎講，一個男人願意去買護膚品俾你，比起買一個幾萬蚊嘅手袋俾你更加值得你去自豪。5年黎每一日只會覺得愛對方更加多，因為幸福沒有捷經只有經營。 呢8年，我每一日都覺得自己好幸福好開心，但係8年前我都有傷過痛過，我有一個對我好差嘅EX，一齊左兩年幾，出軌鬧我呃我錢什至推我都試過，當時明明好唔開心，偏偏就唔捨得分手，以為自己好愛佢，到而家諗返，其實只係唔甘心，覺得自己付出左咁多就放棄會好蠢，原來最蠢係唔識得放手，我無憎過我個EX，我反而多謝佢令我堅強，令我知道我而家有幾幸福，係佢令我知道我值得擁有更加好。我知道要放手真係好難，但係諗清楚，究竟放唔低係因為好愛，因為唔甘心定係因為驚改變？每個人都怕改變，但係只要你肯去踏出第一步，所有野都會變得更好。 其實我唔係一個好善於表達嘅人，中文亦都唔係特別好 （英文都唔見得似外國人 :lol: ），但係好想同大家分享我嘅心情，因為有時睇討論區，見到有D女仔嘅心享，會令我記得自己都曾經蠢過，但係人始於有一日會醒，the best is yet to come，我希望睇緊呢篇文嘅每一個你，都會好幸福，搵到一個真心愛你對你好嘅另一半！:) 多謝你有耐性去睇晒呢篇文, thank you! 我想知道如果我下篇post係淘寶分享，會唔會有人有興趣睇，係下面留言話我知啦！ :D
