自從係美國返香港之後, 皮膚就一直無好過, 不停生暗瘡, 仲要唔係普通暗瘡, 而係最毒最難搞嘅石頭瘡, 每日見到自己就算化左妝都遮唔到嘅皮膚, 其寶真係好唔開心。 今日就想同大家分享下我點用完全天然嘅方法去醫好我嘅石頭瘡,當中好多方法都係我用左好多時間上網做research搵返黎然後逐樣試,並唔係我個人自創嘅方法。 等我簡單交代下石頭瘡係咩一回事, 石頭瘡係痤瘡嘅一種,好多時係因為暗瘡反覆發作,受傷皮膚組織未吸收恢復,新發暗瘡又再出現而形成結節、膿腫,造成皮膚表面凹凸不平。至於點解會出現,好大原因係因為荷爾蒙出現問題同埋太大壓力。 要徹底而又係副作用去醫石頭瘡係一場長期作戰,對我黎講,市面上無論平至開架品牌,貴至SKII,什至成千蚊次嘅facial都係無用嘅。當然你可以選擇去睇西醫,對付呢類型嘅荷爾蒙瘡,通常醫生都會有三種方法,包括Antibiotics去消炎,避孕丸去調理荷爾蒙,再嚴重D會開Accutane, Accutane係一種維他命A,令到你嘅皮膚更新快D,用黎醫石頭瘡係比其他同類型藥有效好多,但係副作用亦都大好多,輕微嘅包括皮膚乾、關節痛,嚴重嘅會令你心情低落、頭痛、聽力視力有問題同埋心跳加速等等。其實所有西醫都會有副作用,如非必要我都唔建議大家去食西藥醫皮膚。 簡單介紹之後就入正題喇,首先,試左好多唔同牌子嘅產品都唔work反而嚴重左之後,我決定停用所有化學產品,轉用皮膚科醫生推薦,最溫和嘅Cetaphil洗面乳同保濕Cream。 通常我只會夜晚用呢枝野洗面,朝早我會用快熟燕麥代替,燕麥唔止對暗瘡好,仲可以幫皮膚保濕同去印,由於會純天然,敏感皮膚都適用,未試過嘅朋友不妨一試,一個月就會見到紅印明顯退左,比市面上好多去印產品更天然更有效。 點擊圖片放大 +2 注意:記得要用暖偏熱嘅水去整濕D燕麥,然後直接查上面按摩幾分鐘,再用暖水洗面就可以喇,如果覺得太乾好難按,可以加少少水。 今日就分享到呢度,當然淨係靠呢三樣野就醫好石頭瘡係無可能嘅,下次再同大家分享我自己整全天然嘅面膜,第一次打Blog, 可能打得唔係咁好, 不過希望你地鍾意呢篇分享,如果有問題,歡迎你留言俾我,我一定會答 :D