而家愈嚟愈多人去越南，第一次去有咩要注意呢？呢篇主要分享吓有關簽證、當地治安、交通、飲食等等嘅個人經驗！ 機票 我哋好遲先決定去，所以冇平機票，買咗國泰，大概係HKD1900@1連稅連香港機場快線來回。時間都幾靚，去程朝早8點半左右，回程夜晚7點幾。大概坐2個半鐘，都好快~ 住宿 我哋book咗airbnb，開放式studio，有rooftop泳池同gym room。屋主非常helpful同有禮貌，間屋都好靚好新淨好有格調，張床2個人訓都覺得好闊好舒服! 樓下仲有Reception同迷你超市㖭! 地點係56 Icon，隔條河就係第一郡，都幾方便。4日3夜大概HKD1400~ 其實附近仲有好多酒店同民宿，HKD100-500一晚都有，可以按自己需要，上網慢慢比較吓再做決定喇~ 網上簽證 而家去越南可以喺網上透過中介申請簽證，填咗資料同俾咗service charge (~USD8@1)之後，1-2個工作天內會收到approval letter，print出嚟，準備2張白底證件相（官方寫要4cm x 6cm，不過我哋試過用香港護照證件相size或者美國護照size都得），填埋個入境表，然後再喺當地落地簽證同俾簽證費用(USD25@1)。落地簽證要幾耐就睇你好唔好彩喇，我哋就等咗差唔多一個鐘…… 咁做好處係比親身去越南大使館申請平幾百蚊，但有個壞處係通常中介會group埋幾個人一齊做，approval letter會寫晒幾個人嘅名同護照號碼，即係其他申請人會睇到自己名同護照號碼。 我係喺 http://www.vietnamimmigration.org 整嘅，都好快，1日就有喇~ 不過最好都係預鬆少少時間啦 天氣 上網睇天氣預測，幾日都係雷雨，都有定心理準備，不過好幸運地天氣幾好，淨係落咗一兩陣雨。日頭雖然都熱，不過有風，唔似香港咁又濕又焗，夜晚仲好涼好舒服㖭! 治安 胡志明市治安比想像中好，起碼我自己冇見到有偷嘢搶嘢嘅情況，過關時亦都冇見到有索賄嘅情況，不過都戴一戴頭盔講句人在外地自己小心啦! 交通 胡志明市嘅交通非常非常差! 嗰度好多電單車，而且好少紅綠燈，所以路口超混亂，啲車有位就攝，不停左穿右插，完全冇分線。任何時間都好擠塞，出門要預鬆少少時間。行人過馬路基本上睇燈都冇咩用，因為啲車會衝紅燈，過馬路真係非常驚險，最緊要係勇者無懼，大無畏精神，一般嚟講啲車會避你，但係當然自己都要打醒十二分精神望清楚啦! 我哋出門幾乎全程都係call urber，主要景點之間都係平均十蚊港紙內一程，就算喺機場去我哋間民宿都係三十幾蚊港紙咋! 環境 胡志明市係一個好舊嘅城市，但大部分街道都好乾淨，冇咩垃圾。佢夾雜好多新舊建築物，有啲建築物或者店舖其實仲設計得好靚㖭! 飲食 去胡志明市梗係要食pho啦! 其實食咗幾間都幾好食嘅，不過有啲可惜嘅係我個人冇食到啲"wow真係好好食呀!!"嘅pho喇~ 除咗經典越南菜之外，其實都有唔少中西日韓菜! 味道幾啱香港人口味，不過個人覺得佢哋嘅嘢飲都偏甜。值得一提嘅係胡志明市仲有好多新舊式嘅coffee shop，一路行一路都有，而且間間都唔少人幫襯架，睇嚟佢哋真係好鍾意飲咖啡! 舊鋪或者街邊車仔檔我哋一律冇幫襯，驚肚痾，不過好多本地人都會就咁喺馬路邊坐張矮凳仔圍埋一齊飲嘢食嘢! 消費 胡志明市物價唔高，我哋2個人兌咗220蚊美金for 4日3夜就啱啱好，不過我哋有一餐西餐、urber同day tour都係碌卡嘅，但係其餘消費我哋都冇就住就住架~ 其他 胡志明市插座係用兩腳圓頭或者扁頭。 有咩問題隨便問，識答一定答，歡迎交流!
