先同大家介紹一下自己,我本身是一名AUDIT佬,(雖然我係一個女仔,不過都會叫自己做佬)之後頂唔順壓力,辭左份工,去左國內做兩年義工,對自己認識多左,番黎香港就讀婚姻家庭輔導,希望幫到更多既人。點知讀讀下,係學校遇到我現任老公,雖則佢聲稱自己都係ENFP,同我性格係截然不同。例如:佢可以宅係屋企兩三日唔出街,我兩日唔出一次街都會患上抑鬱。又例如:佢係一個好慢既人,我係一個好急,有時同佢出街我地兩個要互相調一調腳步。咁係上年,我就正式嫁左比呢個慢慢的小暖男,雖說係小暖男,但係婚姻生活總會有好多要大家學習既地方。之後過左無幾耐,我地就有左BB,雖然我想享受一年二人世界,但有左就要啦,而且年紀都唔細,所以呢排既我就靜靜咁安胎。講左咁耐,終於講到重點,就係點解我要開呢個BLOG,我發現係安胎期間,實。在。太。悶。比起以前可以周圍跳既我,而家日日要躺起沙發,又無聊又廢,我實在頂唔住。所以,我決定開一個BLOG,去記低作為新手老婆既趣事,新手孕婦既不安,一些呢排發掘到既新興趣既分享,希望同大家分享同時,亦比自己睇下點樣渡過呢個充滿未知知數既孕期。希望大家多多指教喔。