貓姑，睇我名就知我完全被貓星人操控。 是的。我係被十級馴化嘅奴婢，每日都神心地服侍我家主子。差一級先到神級因為我地太鍾意去旅行。 冇贏在起跑線，亦都冇金鎖匙，六合彩金多寶又未輪到我中，香港草根嘅典型例子。喺公司係薯蓉一名(比small potato更small)，要一年去幾次旅行日漸成為人生目標！返工就係要揾錢去旅行，放工就係要揾平機票plan下去邊度旅行。一年夾埋一個月到 離家出走，好好喺唔同地方享受一下! 為免我老人痴呆日漸嚴重，的起心肝開個blog，將我地啲happy moment好好記錄低，再同大家開心share,發放正能量 陸續簡單介紹我家成員 飯生，典型嘅獅子座。浪漫，大膽，皇者，主角主義，組織能力超強，要第一，要話事，唔輸得(唔講喇要俾人打喇哇哈哈哈)不過佢對住個女 一啲都唔獅子，永遠都係慈父狀，個女要乜都俾哂佢(真係好彩佢係貓，未識講話要買乜)基本上除咗公司出trip，我地所有旅行都係一齊plan一齊 去。去到每個地方一齊發掘一齊體驗，是幸福的。個人認為去旅行係維持感情嘅最好途徑 大公子，來自安哥拉星球嘅阿虎，今年已經14歲。貓如其名，佢有好似老虎咁威武有型嘅外表，但實則異常膽小，超怕生保人，經常俾阿妹蝦。平時鍾意坐喺床邊望街曬太陽，最鍾意食嘅係膠袋同埋飯生啲頭髮。 妹妹，佢係正宗摺耳武則天。肥嘟嘟到好似摸唔到骨一pat咁嘅佢有齊可愛萌爆嘅面孔，唯我獨尊橫行無度逆我者亡嘅處世方式。全家人都當佢如珠如 寶，一切俾佢玩弄於手掌中。每次只要對奴才們眨下眼，伸下手，典下地，9秒9即刻奴才喳。。。皇后萬歲萬歲萬萬歲。。。摸啊摸啊摸到咕嚕咕嚕咁睡 去。。。 簡單介紹完喇(其實篇嘢勁多字勁長氣囉唔該)，希望大家繼續支持，耐唔耐黎睇下貓姑一家去咗邊度玩或者有咩攪笑無聊嘢啦 ========================================================================== 快啲黎Like埋我個Facebook啦 https://www.facebook.com/melgugotravel
