上回講到第一日落機即刻去食牛肉湯，但人多得濟所以去左第度食 咁究竟係去左食咩呢？ 就係去左食同行者推介嘅，豬肉湯飯 豬肉湯飯？唔係釡山先出名咩？ 韓國咁大，豬肉湯飯都有好多種嘅 上次係釡山食過嘅豬肉湯飯係唔辣嘅 係另外一篇介紹過嘅“豚壽百”都係唔辣嘅 但今次係濟州食嘅就係辣嘅豬肉湯 呢間店唔係咩特別出名嘅店，亦都唔係旅遊區 而係一間本地人先會去，冇中文/英文餐牌嘅家庭式小店 去到外國唔一定要去熱門嘅旅遊推介或者大路嘅食店 有機會嘅都可以去下一啲地道小店，先可以食到真正韓國嘅味道 講返今次介紹嘅就係呢間 하나로국밥 好多韓國食店都只係賣幾款食物，呢度都唔例外 따로국밥 豬內臟湯飯 8000krw 고기국밥 豬肉湯飯 8000krw 순대국밥 豬血腸湯飯 7000krw 我地今次就叫左一個內臟湯飯同一個豬肉湯飯 之前介紹過嘅豚壽百啲湯係白色，冇落胡椒同埋辣椒粉 但係濟州呢間，就落左好多胡椒同辣椒粉，攪左兩下成碗湯已經變左紅色啦 無論你叫豬肉湯飯定豬內臟湯飯都好，入面總會有幾舊血腸 但我本身唔食豬腸嘅，所以接受唔到血腸嗰陣味ㅠㅠ 排除左嗰幾舊血腸，成個湯都幾好味，同豚壽百相比各有特式 如果豬肉湯整得唔好食嘅話，係會有好大陣味，所以呢間係一間不錯嘅小店 食食下見到同行者食辣椒食得好爽咁 所以問佢其實啲辣椒係咪唔辣 佢：係呀，唔辣㗎，試下啦 我：咁好啦（半信半疑） 好小心咁食左一啖仔 我：係喎，唔辣喎 5秒後⋯辣到飛起，飲左半支水都仲係覺得好辣ㅠㅠ 如果見到呢啲辣椒好想試嘅話，而你本身又食得辣嘅先好試 하나로국밥（濟州巿） 地址：제주 제주시 산지로 1-2 營業時間：10：00-18：00 唔想錯過我最新嘅分享，就記得follow 埋我嘅ig 同facebook啦
