外面打邊爐嚟講，我個人比較鍾意一人一鍋，因為可以揀自己鍾意食嘅嘢，價錢又經濟實惠啲。市面上嘅選擇有限，今次竟然畀我喺屋企附近搵到食一人一鍋嘅好地方，100蚊有找之餘，仲食到好飽呢。 餐廳提供嘅一人一鍋嘅選擇有好多，單係湯底同配料組合，超過10個選擇；包括台灣古早牛肉火鍋、蟲草花養生小火鍋、台灣卜卜蜆小火鍋、麻辣三杯雞（/卜卜蜆/豚肉）小火鍋、沙茶牛肉（/雞脾肉）小火鍋、酸菜白肉小火鍋、蕃茄濃湯（豚肉/雞脾肉/牛肉）小火鍋及日式壽喜燒（豚肉/雞脾肉/牛肉）小火鍋，令人眼花瞭亂，心大心細。幾經篩選，我先揀到「蕃茄濃湯配雞脾肉」配「新竹米粉」。你可以配其他主食，例如米線、公仔麵、白飯、渝川麵(+$3)、肉燥飯($4)和日本稻庭烏冬($12)。 小火鍋套餐 $81蕃茄濃湯雞脾肉小火鍋 配 新竹米粉 落單無幾耐，火鍋就來到喇。呢個雖然叫「小火鍋」，但好足料，除咗我揀嘅雞脾肉之外，仲有魚腐、玉子豆腐、豆卜、金菇、娃娃菜，蕃茄同粟米，仲配埋新竹米粉。睇見咁多嘢，未食都知道呢餐一定夠飽。 蕃茄湯底夠濃郁，雖然我無飲到個湯底，但係滾熱的配料，好似粟米食起嚟都食到微微酸味，就知道個湯底夠濃啦。 米粉另上，我食咗一半配料嘅時候，就將米粉放入去，等佢慢慢滾稔。雞脾肉絕對係另一個重點位。因為雞脾肉勁嫩滑，同埋一啲雪味都好。雖然應該唔會係新鮮雞，但都處理得好好，無雪味之餘，食落有咬口，唔會「霉」。餐廳侍應都好細心，見到個鍋剩低好少湯，就會主動幫手加湯，好難得。鍋入面其他配料都唔錯，如果可以有深綠色嘅菜選擇就perfect～因為我唔係好鍾意食娃娃菜，同埋深綠色嘅菜營養價值高啲。 平時我好少食新竹米粉，但原來打邊爐配新竹米粉比廣東米粉更好味～新竹米粉較幼細，更易「索汁」，更加快熟，吸到更加多湯底嘅精華～～ 如果一個人就咁食呢個餐真係會好飽，好彩我哋2個人share，同時又可以試下其他嘢食。 古早牛肉麵餐 $83 連小食及飲品我們另外都叫咗古早牛肉麵，牛肉麵夠大碗，牛肉有三大嚿，份量合理。牛肉炆得幾好，夠入味，唔過鹹；而食起嚟口感都啱啱好，唔會太稔，一咬就散；湯底都非常濃郁，啲麵唔同平時食嘅上海麵，偏扁身，不過食落唔會太軟，都有咬口。 鹽酥雞 (跟餐小食)牛肉麵可以跟餐配小食，食台灣嘢點可以無鹽酥雞？鹽酥雞雖然唔算多，不過都可以滿足到我哋嘅心癮，太掛住台灣夜市喇～鹽酥雞一啖一粒，細細件；炸粉唔厚，外皮炸得酥脆，裡面啲肉仲保持到juicy感，調味恰好，可以一解思念愁懷。 盆栽珍珠奶茶 (跟餐飲品) +$5呢杯珍珠奶茶真係好大杯，如果一個人飲真係會飽咗，唔使食飯。盆栽珍珠奶茶同一般珍珠奶茶唔同嘅地方，就係多咗一啲忌廉同曲奇碎，其他嘢分別唔大。珍珠奶茶唔太甜，茶味同奶味平衡得宜，唔會奶味太重。珍珠都略帶甜味，幾煙韌～唔錯呢。 芝士玉子(6粒) $29相對上面介紹嘅嘢食，呢個小食賣相真係遜色好多，唔夠吸引。其實炸皮入面嘅玉子豆腐好嫩滑，味道都唔差。如果賣相上可以改善下，我覺得絕對可以吸引多啲人點。點擊圖片放大 估唔到大商場都有呢類可以支持嘅食肆，而且仲係不時會掛住嘅台灣美食同一人一鍋，以後可以多啲去喇～搵食點：101台式休閒餐廳搵食方向：青衣青敬路33號青衣城二期地下G30號舖餐牌參考點擊圖片放大 +9
