疫情之下，無得去台灣，我同大家一樣對台灣夜市美食心癢癢，超懷念！上個星期，拉埋朋友一齊去香港同樣有TW簡稱的荃灣，食返餐台灣嘢止下癮！ 大概6點去到，餐廳門口已經唔少人等位，好彩朋友早啲到，我到咗之後唔係等咗好耐就入得喇！餐廳唔算大，食物都上得快，似乎都係行「速食」嘅節奏，速戰速決，因為我哋嚟之前已經喺網上睇過MENU同評價，所以好快就決定到叫咩食～ 你妳珍珠魯肉飯 $36 魯肉飯係我去台食餐廳必食嘅嘢，呢個加咗珍珠，叫個陣其實有啲怯，自己已經有晒心理準備，預咗有「伏」。點知，食咗一啖，又OK喎～唔伏呢～你會發現，整碗飯都是沒有魯肉的，但是就有很多大大粒透明嘅珍珠。 原來，餐廳是將魯肉飯精髓——都注入了粒粒珍珠內。吃到珍珠，就會嘗到魯肉汁的味道，很特別。除此之外，這碗飯還有其他配料，如肉鬆、炸蒜、青瓜及半隻溏心蛋，超豐富。珍珠口感彈牙滑溜，又真係魯肉汁味，同飯一齊食，完全無違和感；加埋肉鬆同炸蒜一齊食，更加惹味可口。 鹽酥雞花枝丸乾拌麵 $78呢個本身係飯，不過因為點咗魯肉飯，所以就轉做乾拌麵。 鹽酥雞同花枝丸都好吸引，炸花枝丸有4粒，而鹽酥雞都有一大堆，勁足料。花枝丸微甜，彈牙又爽口，而鹽酥雞炸得黃金，外層香脆而內裡嫩滑，肉質唔柴又唔乾，沾甜酸醬食，更加開胃。唔怪得我見到檯檯都食鹽酥雞。 乾拌麵嘅拌麵汁原來都是用魯肉汁，今次真係有肉碎嘅。麵條係台灣麵，較粗身，有咬口，而且每一條麵中間有扭扭坑紋，令佢更易掛汁，食落更添滋味！ 台南鮮蝦卷 $45今次無叫小食拼盤，反而想試下比較少見嘅台灣小食，好似鮮蝦卷同米糕。 蝦卷個樣幾似魚肉春卷，不過呢個係蝦卷，入面有啲蔬菜粒。一碟切開咗有8件，我哋好快就食晒，因為超彈牙，而且炸得酥脆而不膩，啖啖蝦肉，正！ 台南米糕波波球 $45睇個名都唔係咩係米糕，呢個波波球從未見過，今次真係第一次見，原來即係糯米飯。 佢就好似平時食嘅糯米飯，主要有冬菇同花生，都有肉鬆和芫荽，搓圓到成個波波咁嘅形狀，味道有啲似臘味糯米飯，又有啲似粢飯，幾好食，值得一試。不過真係一個就夠，因為糯米飯真係好飽肚！ 炭焙烏龍珍珠鮮奶茶 原價$35，加$8就可以配因為我哋叫咗唔少嘢食，驚太飽，所以只係點咗一杯飲品。 茶味濃郁清新，奶同茶嘅比例恰好，入口都香滑，只係奶茶可以甜少少，珍珠可以再煙韌啲。仙草３號 $46 如圖所見，呢個甜品有三色芋圓、包餡芋圓、布丁同水晶，仲有最重要仙草。 布丁細細粒，係小時候食嘅啫喱小布丁，好得意～仙草夠滑溜，少少甘甜，而苦味唔算明顯，幾好。芋圓有我最愛嘅包餡芋圓，外煙韌，內軟糯，無得彈！其他芋圓都正正常常，幾煙韌；水晶滑滑哋，當啫喱咁食。呢個糖水整體唔會好甜，唔錯！ 食完之後飽到上心口，但係真係超滿足！食完之後先發現原來佢同之前元朗食嗰間係姐妹店，咁之後真係要支持多啲喇！ 搵食點：你妳搵食方向：荃灣運通街6號運通洋樓地下K號舖
