最近到超市便利店時，看到不少新零食。為食的我終於忍不住出手又出口，買返嚟同同事一齊食，之後同大家分享當中有無伏！ 卡樂B美式水牛城雞翼味薯片 代價：$12.9 搵食點：7-11 包裝：奪目吸引，大大張水牛雞翼嘅圖，睇到人流曬口水。 香味：一打開，已經傳嚟一陣酸酸甜甜同一啲香料嘅味，好成功！ 味道：有一位同事食咗一執就已經話好好味，仲話呢個新味食得過。我個人覺得酸酸哋，都唔錯；食落亦有辣味，但唔會好辣。令我最印象深刻嘅係佢嘅香味，唔通真係加咗香草？口感方面，因為係厚切同波浪形，所以感覺實在啲。 MARS Brownie 代價：$15，一包有4個，比預期中抵，比原來的MARS平。 搵食點：優品360 包裝：冇乜驚喜，如果唔係專登搵，仲以為呢包係普通嘅MARS朱古力，走漏眼呢！ 香味：無乜特別？就是MARS朱古力味 味道：我請同事食，佢一見到就say NO，因為佢以為係普通嘅MARS棒，仲話「好甜架，唔要了」。我話係新出嘅MARS Brownie，唔同嘅，佢就收咗，話慢慢食……XDDD 切開，裡面比平時嘅MARS多咗一層蛋糕！外層係朱古力脆皮，餡就分別係焦糖拖肥軟心同Brownie蛋糕，雙重口感。Brownie蛋糕入口軟身濕潤，朱古力味道突出，而焦糖拖肥軟心就甜咗啲。整體感覺偏甜，但又未至於甜到漏嘅感覺！ Koikeya Pride Potato魅惑の炙り和牛（日本湖池屋和牛味薯片） 代價：$26/2 搵食點：優品360 包裝：好簡約但予人高一級的感覺！ 香味：未食已經聞到一大陣和牛味，我不斷用個鼻「索」，哈哈！ 味道：薯片雖然薄切，但完全無出現「易碎」現象。因為薄，所以口感好脆，係我喜歡嘅薯片口感！薯片用咗黑胡椒嚟調味，所以好易入口，無咩伏，食落就似珍珍牛仔片嗰種味道，不過係薯片！ 寫文時先知原來呢包和牛味薯片年初喺日本推出時好搶手，仲賣到斷晒貨！同一品牌湖池屋其實一共推出咗三種新口味薯片，以品牌「KOIKEYA PRIDE POTATO」命名，直譯就係「讓湖池屋驕傲的薯片」！唔講真係唔知咁勁，好彩宜家買到，無走寶呢！ 鍾唔鍾意睇呢啲試食報告？鍾意就用行動話我知，大大力share，亦都可以留言講下想我試食啲咩，話唔定我都有興趣試呢！ ======================================================== 多謝你閱讀我的文章！Facebook Page上有最新最快的 Updates，記得Like 同 Follow 喇 ^.^！ Facebook Page Instagram Website: http://bit.ly/1QYFQCN *Contact Me: mavis.eatndine@gmail.com
