估唔到，愚人節出街，都會見到新嘢！ 當日去到尖沙咀，到咗K-11附近的加拿分道。當時5點鐘，未夠鐘食晚飯，但我已經肚餓，要搵嘢食。點知一上地面行行下，就見到新店開張。饑餓的我當然踴躍上前睇下有咩食，止下肚餓。 一睇，嘩！點解咁啱係我最想食，最鍾意嘅薯條！真係好感動，我就拉住男朋友一齊去幫襯。薯條齊集４款口味，分明係芝士味、酸忌廉洋蔥味、燒烤味及特辣燒烤味。如果要齊，就要選最大的Tera Size。我們揀咗Mega size，可以揀2種口味：洋蔥酸忌廉和燒烤味！ 落完Order，店員就喺啲Pan度「畢」薯條上嚟，當日岩岩開張，門口好多花牌，亦都擠滿人，但店員都好快手，等咗一陣就有得食喇！ 薯條好多呢，未食都已經聞到好香。呢度薯條的感覺就好似平時食麥記的shake shake薯條，不過呢度就一大碗，幫你shake 好咗ge！薯條係幼身，唔係粗薯條，不過炸得無平時麥記嗰啲咁稔身，食起上嚟，口感好好多。 至於味道呢，酸忌廉洋蔥味令人食到停唔到口，酸得嚟好吊味；而燒烤味就反而無乜特別，就同平時食嘅薯片（燒烤味）差唔多。 不過，重點係，平時食麥記啲薯條會覺得愈食愈鹹，愈食愈油，但呢啲薯條就唔會喎～我同男友食剩半碗都唔會話好想飲水，而隻手都無咩油。我估係因為炸完之後，保溫同隔油工夫做得好。 原來呢間店係源自菲律賓架，今年４月１日就首次進駐香港。大家快啲去試下啦！ 搵食點：Potato Corner 搵食方向：尖沙咀加拿分道8-12號嘉芬大廈地下 代價：$34 ======================================================== 多謝你閱讀我的文章！Facebook Page上有最新最快的 Updates，記得Like 同 Follow 喇 ^.^！ Facebook Page Instagram Website: http://bit.ly/1QYFQCN *Contact Me: mavis.eatndine@gmail.com
