今次介紹嘅係無論送比男朋友定女朋友都適用嘅心思禮物！每逢生日、紀念日、節日等等就好頭痛，特別係已經一齊左好多年嘅情侶，基本實用性禮物(銀包、皮帶、首飾等)都送過，手作禮物(相簿、日記、頸巾等)又送過，究竟仲可以送咩係會令另一半感動又驚喜呢？答案就係.....IG Account啦！唔明?睇埋落去啦！其實份禮物就係整一個屬於你哋兩個人回憶嘅IG Account，有d類似手作相簿嘅概念，但係又唔需要你將所有相print晒出來再痴上去，又再寫字上去，而且相簿未必可以放晒你咁多張相，而ig就可以容納更加多內容。咁跟住落嚟就介紹下我點樣set呢個account啦！☆°．﹒☆°．﹒ ☆°．﹒ ☆°．﹒ ☆°．﹒ ☆°．﹒☆°．﹒☆°．﹒ ☆°．﹒ ☆°．﹒ ☆°．﹒首先，你要開一個新account，記得將account設置成private！另外account改名方面最好避開你地個名有嘅字，同埋要留意唔好用返你地個樣做icon，防止IG將呢個account推薦比你另一半嘅時候見到。咁基本設置搞掂之後就開始要將你哋之間嘅相或者對話做整合，按時間順序排列返。例如我自己會由相識作為開始，而我之前亦都有back up whatsapp對話嘅習慣，就可以cap低我見到想show嘅對話，加埋兩個人嘅相，根據返發生嘅時間順序去整合。準備好呢d資料之後就可以upload呢d相上去，不過我自己係無post任何相，而係選擇po ig story，因為可以比較方便加字同gif上去每一張相度，而另一半睇嘅時候都比較方便，所以我整左第一個story嘅封面之後就開始逐張相po上去。 整好IG Account之後點樣送比另一半就大家各自根據情況而定啦，而我送嘅時候因為已經同另一半一齊左6年，所以準備左6份禮物比佢，其中一份就係用盒裝住張紙，上面寫住呢個ig account叫佢follow，跟住就兩個人一齊笑住咁睇返以前肉麻嘅自己。☆°．﹒☆°．﹒ ☆°．﹒ ☆°．﹒ ☆°．﹒ ☆°．﹒☆°．﹒☆°．﹒ ☆°．﹒ ☆°．﹒ ☆°．﹒其實自己整呢個ig嘅時候自己回顧返以前嘅日子都有一種獲得禮物嘅感覺，如果你都諗唔到有咩禮物要送而又唔怕麻煩嘅話，可以試下整呢個禮物，話唔定，會帶你搵返曾經嘅自己，曾經嘅你哋。
