疫情嘅關係，個個都Staycation，無論拍拖、生日、聚會定親子活動，全部都可以去Staycation。而我本人都係2020年嘅生日被體驗左一次😂 話說我男朋友諗住比個生日surprise我所以係逸東酒店準備左Staycation，依家就同大家分享一下有啲咩要注意先！如果要痴氣球，請買定3M雙面海綿膠紙因為男朋友分享返佢痴氣球嘅時候用普通雙面膠紙痴完個氣球就會不停跌返落嚟，所以佢最後出左去附近中南廣場買3M膠紙先痴得到，而且我地搣走嘅時候都唔會留印。 氣球可準備多一份預防漏氣當我男朋友痴完氣球，擺完床上嘅心心紙碎之後佢發現，「H」氣球漏氣，謝晒皮，於是....佢又出左去中南廣場買氣球，但由於之前嘅果set氣球係深水埗買，價錢平好多之餘，中南廣場買果個「H」係同原先果套顏色唔同，所以大家可以下次買定多一套做後備！ 幫女朋友準備卸妝Tissue&面膜因為生日呢啲日子，女朋友一定有化妝，但又唔可以話佢知當晚要係酒店過夜，咁就唯有去買一包卸妝濕巾(下圖)，等女朋友可以清潔乾淨塊面，今次真係要讚下男朋友貼心啦！不過，如果佢可以買多塊面膜比我就更加貼心了😂因為個個女仔洗完面都會搽面，無得搽一日半日都唔緊要，用面膜頂住都Okay嘅，想做貼心男朋友就記得買呢兩樣野啦！ 幫女朋友帶眼鏡或con如果女朋友係平時帶開眼鏡，而化妝就會用one day con嘅話，就記得幫佢拎埋眼鏡或者拎多副con啦，事關我就係果個近視又要貪靚嘅女仔，生日果日戴左one day con，男朋友又無幫我拎眼鏡，之後第日就朦查查咁過左一日😅當然啦，如果女朋友係戴月拋嘅con就可以去眼鏡舖買支細細支嘅con水就可以了！如果想再窩心啲，幫女朋友執衫嘅時候可以幫佢拎埋BB cusion或者粉餅，咁佢就可以第日唔洗素顏出街啦！唔知咩係BB cusion? 就係好似下圖咁嘅樣，睇下女朋友有無類似嘅野啦！ 最後，真心好感動男朋友同我一齊咁耐都仲會為我做一啲驚喜，相信即使大家做得有幾笨拙都好，女朋友個心都一定覺得好sweet💗希望我地嘅經驗可以幫大家行少啲冤枉路，做個醒目又貼心嘅男朋友😉
