【聖淘沙】 【聖淘沙】馬來話代表「寧靜」，係新加坡一個出名嘅【旅遊渡假島嶼】。 聖淘沙與新加坡本島以一條跨海大橋相連， 島上有新加坡環球影城、水族館、水上樂園、斜坡滑車等設施。 從市區去聖淘沙，可以： 方法1: 先搭地鐵東北線或環線到港灣站(Harbourfront)下車， 再到怡豐城(Vivo City)轉搭輕軌列車(Sentosa Express)/巴士/步行前往。 方法2: 從市區直接搭乘巴士前往。 我地貪方便，當然係用方法1啦～ 去程由Vivo City沿Sentosa Boardwalk 步行入島， 回程就試下搭輕軌列車，最後行埋Vivo City。 來回聖淘沙嘅輕軌列車站，位於Vivo City 3樓 (最高嗰層)， 所以地鐵一出閘，沿指示牌就可以好輕易搵到喇！ 全程有瓦遮頭，落雨都唔怕～ 由於聖淘沙本身都幾商業化，千祈唔好以為行路就免費呀～ Sentosa Boardwalk都要收每人$1坡紙 (約$6港幣)， 作為日常維修步道嘅費用！ 不過當然係比搭輕軌列車平得多... (輕軌車費:每人$4坡紙，約$28港幣) 亦可能因為係收費步道，成條Boardwalk好乾淨，行得好舒服。 仲有自動扶手電梯上山，行得完全唔辛苦！ 【SEA水族館】 其實成個聖淘沙都有好多遊樂設施，而且規劃都幾完善。 輕軌列車總共途經4站，每站都可以去到島上唔同嘅景點～ 因為我地之前已經去過日本環球影城， 所以我地今次就唔去新加坡呢個喇， 揀咗去【SEA水族館】+玩【斜坡滑車】。 一行入水族館門口，就會經過一條透明隧道， 同海洋公園嗰條差不多，會見到好多魚喺你頭頂游來游去！ 不過可能因為已經見過，條隧道好短又好多人， 所以我唔覺得好震撼～哈哈哈！都係水族館例牌有嘅野咁啦 XD 跟住一路行，見到唔同嘅海洋生物。 我最記得就係呢D識發光，全身好色彩繽紛嘅魚～ Shocking pink + 鮮黃/藍色，真係好靚！ 一路行，都係睇下鯊魚、魔鬼魚、水母咁～ 到最後壓軸出場【超大型水族箱】！ 比我想像中大好多嘅水族箱，真係好震撼～ 水族箱前面仲有幾級樓梯俾參觀人士倚在欄杆影相... 係幾貼心，不過由於現場都幾黑，加上好多人， 我就覺得有d危險，一下唔小心好易會仆親！ 成千上萬嘅海洋生物喺你面前游來游去～好正！ 【斜坡滑車】 行完水族館，我地搭輕軌去Beach Station(海灘站) 玩【Slyline Luge斜坡滑車】。 目前亞洲只有新加坡同韓國可以玩架咋～ 首先要買飛，之後搭空中吊椅上山， 但畏高人士注意: 話明「吊椅」就真係一張椅！(廢話～哈哈！) 並唔係吊車咁有車箱，所以隻腳係會「吊吊fing」架 XD 同埋其實座山都幾高，無車箱包圍住， 我就覺得好free，風景好靚喇 ❤ 不過我身旁畏高嘅姚生就一路搭，一路驚！哈哈哈～ 呢個就係山下買飛車站，可以揀買玩１次/3次... (已經連埋上山吊椅費用) 上到山之後，有唔同路線可以揸 。 有長有短，有D刺激少少～ 一開始會有人教點揸，又有一段路俾你試下自己控制架車先～ 試咗無問題先出發！ 我地玩咗3次，真係超好玩！玩到唔捨得走～ 本身我都驚會揸得太快/失控/唔知點操作.. 但之後愈玩愈興奮，又拍埋片～ 真係一個好好嘅體驗！ 十分推薦大家要去玩下呀！
