第二日*去新加坡著名景點【小印度】同埋【竹腳中心】~ 新加坡交通四通八達,著名景點大多有地鐵直到,十分方便! 而我地今次住嘅酒店位於市中心地鐵站, 去【小印度】站只需搭地鐵藍色線,5個站就到喇! 由於我地未食早餐,太肚餓~ 所以一到埗已經急不及待衝去竹腳中心醫肚先! 【竹腳中心 Tekka Centre】 竹腳中心位於小印度地鐵站附近,步行2~3 分鐘就到。 一樓主要係濕貨市場及熟食區, 感覺有啲似我地香港嘅熟食中心。 而二樓主要賣印度服飾、生活用品等等。 咩叫【竹腳】呢? 所謂【竹腳】,馬拉文係 Kandang Kerbau (意思係「水牛圍欄」)。 相傳竹腳中心位置早於上世紀20年代係養牛及宰牛場。 由於當時嘅【小印度】係殖民地時代嘅分區, 加上英國實行「種族隔離政策」, 所以小印度區就成為咗當時大量印度移民及外勞嘅聚居地喇! 時至今日,好多小印度嘅居民都會喺竹腳中心買餸,解決日常所需, 所以你喺竹腳中心會以為自己去咗【印度】咁~ 完全唔為意自己其實喺新加坡呢~哈哈哈! 我地周圍行咗一陣,極速喺熟食中心搵咗個座位... 就買咗蝦麵、咖哩、椰青、薄餅~開餐喇! 【545 黃埔蝦麵】 呢間又係見多人食,跟住去買嘅蝦麵店~誠意推薦! 5 大隻鮮蝦,加上幾塊豬肉及秘制甜醬, 粗麵彈牙爽口,啲汁食到最尾一啖都仲有,好味! 返到酒店check下先知...原來呢間麵店好出名... 已經有80多年歷史,係世代相傳嘅老店! 仲要連CNN名廚都曾經採訪過呢~好厲害! 推薦大家去到竹腳中心要試下喇! 【小印度區 Little India】 食飽飽,由竹腳中心行過幾條街就到【小印度區】喇~ 呢區以其傳統印度餐廳聞名,街道色彩繽紛, 成條街都可以見到充滿印度感覺嘅大象擺設!真係好有印度feel~ 仲有呢區嘅建築物同寺廟都好有特色, 走入小印度區,就好似返咗迪士尼公主世界咁!周圍都好靚呢 :) 之後我地就去咗最出名嘅【哈芝巷 Haji Lane】行下喇... Coffee Shop、雪糕店、理髮店、服飾店,應有盡有! 每間舖都係小店,地下開舖,而樓上就係店主嘅屋企... 每橦樓外牆都油上不同嘅顏色~ 我最鍾意行小店架喇!呢度每間舖都好有個人風格... 慢慢行下,影下相,行到攰又可以搵間cafe坐下... 同店主傾下計,尋下寶,話唔定會有意外驚喜呢~ (P.S. 好多舖頭d櫥窗都好靚 ❤❤) 【魚尾獅公園 Merlion Park】 周圍行下影下,好快就天黑了~ 最後我地去到位於萊佛士坊站旁嘅【魚尾獅公園】,朝聖一下! 由公園望去對岸,會見到【濱海灣花園】同埋【金沙酒店】~ 下圖就係【金沙酒店】喇! 酒店由三橦主要建築物建成, 最高層係有名嘅【無邊際泳池】,只限酒店住客使用! 為咗試下個泳池,我地呢個Trip嘅最後一晚都住喺金沙酒店呢 :) 小建議: 建議大家夜晚先去魚尾獅公園, 因為每晚由8點開始,酒店都會有【光影水幕表演】。 歷時約15 分鐘嘅表演,包括LED燈水舞噴泉及現場音樂! 不同嘅LED燈由酒店照射落平靜嘅水面,幾靚,幾好睇的~