好多人會話新加坡同香港好似，好悶.. 玩2, 3日咩都玩晒，消費又貴，去過一次都怕怕。 但其實新加坡都有好玩好食嘅地方架.... 今次去完馬爾代夫，因為要轉機嘅關係... 決定順路去埋新加坡～嚟一個【獅城深度遊】啦！ 到埗第1站, 當然係去【食.好.西 】- Maxwell Food Centre 呢個熟食中心位於牛車水，好出名架！ 其實新加坡有好多呢類型嘅熟食中心.. 入面大約有20-30間舖，由粥粉麵飯、飲品、甜品都有... 應有盡有，想食咩都得～ 不過就又係「冇.冷.氣」， 大家要記得搵個好位，對正個風扇喇.. 仲有...大部分舖頭通常只開好短時間， 好多下午2,3點賣晒就關門～ 特別係出名嘅名店～大家去之前要留意喇!!! 【海南雞飯】 本身想去食好出名嘅【天天海南雞飯】， 但點知去到先知佢休息 (又會咁好彩，撞正休息日 /_\) 一場去到，無理由唔食返個海南雞飯～ 結果幫襯咗【宏香雞飯】..點了細雞飯餐 廿零蚊港紙，仲有埋例湯... 啲雞好滑，好有雞味，唔會好多肥膏， 重點係全熟，唔會啲雞骨仲有血紅色..好好味 不過略嫌啲飯油咗少少～ 【真真粥品-魚片粥】 兩個人食一個細雞飯，當然唔夠，正諗緊食咩之際.. 見到隔離兩個舖位，有間粥店好多人排隊～ 大熱天時，咁熱食粥都幾辛苦，不過仲咁多人排... 就知道肯定係好野...唔理喇，我地又排埋一份 XD 佢地營業時間上午5點半-下午2點半，星期二休息 只係賣【魚片粥】、【雞粥】、【皮蛋粥】幾款， 每款都可以揀大中小size 呢碗就係魚片粥(細)，$3坡紙，兩個人share食都好夠啦～ 因為啲粥好棉，質感好似bb糊仔咁， 完全食唔到一粒粒米～好飽肚！ 加上蘿蔔乾及蔥頭、薑絲... 仲有好嫩口嘅魚片，超好味呀～ 食飽飽，就出發去第二個景點喇～
