上篇講咗點揀resort，今次就開始講下行程啦！ 由於係Honeymoon 嘅關係，搞結婚已經忙到一頭煙 ！ honeymoon當然唔想plan，唔想煩啦～ 所以今次冇點格價，好快就幫襯咗旅行社買馬爾代夫package！ 知道有唔少人會選擇去歐洲， 但又要plan行程、買車飛，實在冇咁多時間搞！ 馬爾代夫基本上可以入到島先再決定玩咩都得， 快靚正～真係一個唔錯嘅選擇！ 12月中結完婚，又唔想honeymoon拖咁耐，冇晒新婚mood， 焗住聖誕旺季去，最後揀咗入住【Hurawalhi Island Resort】 2017年新開幕、擁有世上最大海底餐廳、著重環保.... 重點係....不招待15歲以下訪客， 簡直就係為新婚蜜月新人而設嘅天堂呀！ 起碼唔會食食下飯，旁邊有小朋友喧嘩叫喊，可以真正relax～ All-inclusive package 價錢大約hk$25,000一個人，4日3夜 Package包括: (1) 新加坡航空來回機票 [香港-新加坡, 新加坡-馬累] (2) 島上一日三餐buffet (如果水底餐廳/candle dinner 就要另加錢) (3) 島上飲品:果汁、汽水、cocktail、大部份紅白酒、香檳 (4) 房內小食: 薯片、朱古力 (5) 免費借用潛水用品 (6) 一次日落航行活動 (7) 免費任玩島內設施 (e.g. 遊戲室, 瑜珈班) 【馬累市】 經過幾個鐘頭機程，好快我地已經到達馬累市， 晚上10點幾，賓館人員喺機場接送我地到達【 Season Holiday賓館】。 由於第二朝要7點幾搭水上飛機入島，所以一到埗就即訓覺！ HK$600一晚，包2位早餐， 成座賓館望落好簡單，有啲似渡假屋。 好普通嘅賓館，冇咩特別， 不過床舖、廁所尚算乾淨衞生， 以呢個價錢，包埋早餐，性價比唔錯～ 早上賓館對出嘅街道，完全冇人！哈哈，可能太早了～ 仲有一個小沙灘，未入島已經好有渡假feel啦！ 早餐有多士、腸仔，再加奶茶咖啡果汁， 腸仔好咸，唔太好食， 不過賓館包埋，食少少先入島啦～
