我同好多香港人一樣，去旅行黎黎去去都係台灣、日本、韓國。 終於喺上年年尾，去左我一直夢寐以求嘅地方【馬爾代夫】。 馬爾代夫呢個地方，比我嘅感覺係好relax，好悠閒，水清沙幼... 所以我好堅持，我一定要同愛人去呢度honeymoon ❤ 由於馬爾代夫總共有200幾個島，每個島都由不同集團所經營， 因此resort嘅坐向、水底睇到咩景色都係截然不同的。 仲有分【水上屋】同【沙灘屋】 坦白講，第一次去真係睇到資料睇到我眼花 (哭 /_\) 希望我第一篇blog可以俾到小小揀resort tips俾大家啦！ 旅遊季節 每年12-4月係馬爾代夫嘅旺季，較少落雨， 但同時人人都呢段時間去，自然房價就會貴D喇！ (比起淡季，旺季通常貴一倍左右。視乎你幾時訂房啦) 好似我咁12月聖誕節前去，通常都貴到癲， 有d出名嘅resort仲會規定你最少住幾多日先接受booking！ 無計，嗰啲resort太多大陸人去啦～ 你懂的 :) 另外，每年5-7月係馬爾代夫嘅雨季， 假設你去6日，應該有一半時間都係落雨。 我有朋友試過7月頭去5日，基本上3日都落雨。 落雨，浮潛通常都唔玩得，仲要D海水會較為混濁， 但同時因為淡季，房價通常平好多， 大約HK$8,000 - 10,000 (all-inclusive)都有，當然有d resort仲平d啦！ 所以大家要諗定咩日子出發啦～ Resort新舊程度 基本上，馬爾代夫每年都有新resort開幕， 我建議大家一定要揀新resort！ 原因好簡單，設施新淨啲， 仲好多會有開幕promotion，慳得一蚊得一蚊嘛。 私人海灘屋 vs 水上獨立屋? 沙灘底 vs 珊瑚底? 每個Resort房型通常分兩種: 【私人海灘屋】及【水上獨立屋】。 私人海灘屋，一行出屋就望到沙灘景，價錢又平啲， 食飽飯慢慢行返屋都幾浪漫寫意❤ 另外，水上屋又分為兩種：【沙灘底】及【珊瑚底】 。 【珊瑚底】 顧名思義，就是屋下已是珊瑚礁， 可以看到豐富的珊瑚及海底生物，真係可以一跳落水就同魚仔玩遊戲， 有啲resort仲可以見到鯊魚bb。 不過，想睇大少少嘅魚通常都要游出啲～ 因為喺屋下嘅魚通常都好細條！ 【沙灘底】的水上屋，通常一行出海底就係「沙」。 雖然冇珊瑚底咁多海洋生物，不過影相就靚D... 試想像企喺海中心，影出黎嘅相海水透明到睇到隻腳， 沙點都靚過珊瑚底嘅一片綠色啦！ 哈哈 XD 我今次就入住 Hurawalhi 珊瑚底的水上屋， 真係一行出落台就見到魚喇～ 超開心～望住D魚游來游去，好寫意！ All-inclusive? full-board? half-board? 入到島樣樣洗費都係$$$，連飲枝水都要錢， 所以喺訂酒店時，要記得留意自己買咗咩package呀！ 當然不同resort分類各有不同，但一般分為以下3類: All-inclusive: 全包, 包一日三餐及大部分酒水香檳 Full-board: 包一日三餐 Half-board: 包早及晚餐，午餐不包如果唔係好喜歡飲酒的話，其實 Full-Board 一般都夠。 不過，當然全包就好啲啦，唔洗飲枝水都就住就住嘛！ Half-board 我就唔太建議，因為島上食一餐都幾貴， 加上玩浮潛/其他活動通常要另外再俾錢。 邊種plan抵啲，大家就要計下數喇！
