葱仔越南包，大概係我每次喺大角咀附近都必食嘅食肆，舖仔細細好似唔太起眼，但門口有個好顯眼嘅白底葱仔招牌 舖頭內座位唔多，但裝修清新簡約 舖頭專心做好一樣野，就係越南包，原個同半個包，散叫同單點都有，喜歡嘅甚至可以剩係買個包攞走，而另外有湯同菜配搭，價錢都非常親民 呢度係菜兩份，每次黎都有唔同選擇，通常都會有西蘭花同有出面比較少有嘅秋葵，而且好新鮮，加上XO醬添上一份香氣 湯品有粟米南瓜湯同磨菇湯，兩樣都係誠意之作，磨菇湯有菇蓉加上菇粒，好足料，而南瓜湯嘅南瓜係足料南瓜煮出黎 食葱仔始終係越南包先係主角，呢度係半個包，好細心咁用袋袋好唔怕啲汁滴到周圍係 個包真係好足料，多到唔記得有無數漏，有烤肉、芫茜、蔥、肝醬、醃甘筍絲、醃蘿蔔絲、蛋黃醬、辣椒、豬肉鬆，最底有扎肉 加起黎嘅味道就係豐富嘅層次感同足料嘅咬感，但又唔會因為過多嘅餡料而甩到周圍係，而個包都唔會太大太乾太硬，成個越南包都好平衡好出色 之前黎有檸檬水可以自己斟，今次黎有好似羅漢果味嘅茶，有心意 葱仔越南包呢度舖仔細細但的確成間舖頭做得所有野都好出色，而另外值得一提嘅係顧客通常都會主動幫手清返乾淨自己張枱同放返個盤係出餐位，同埋顧客係自行找續，減少老闆要掂到唔乾淨錢嘅機會 按我睇更多葱仔越南包嘅相片及介紹 蔥仔越南包 地址：大角咀櫸樹街(富多來新邨商場)52號地舖 電話：3590 5561 FB：https://www.facebook.com/葱仔越南包-342528303105164/
