有朋自遠方來，不亦樂乎！ 澳洲Working Holiday 嘅時候識咗好多唔同國籍嘅朋友，今次就有台灣朋友嚟香港，就做私人導遊帶佢食地道美食。 由於朋友住係炮台山五洲大廈嘅Backpacker，佢第一日落機我地好自然就去附近食嘢，炮台山本身無好多好味食肆選擇，但走過北角就係兩個世界。 晚飯前嘅時間，肚餓又未開飯想搵嘢咬下，啱啦，就去食下香港地道小食雞蛋仔，嚟到北角就更加要試出名嘅北角雞蛋仔，呢間舖係其他區都有分店，不過呢間就係創始舖，舖頭位置唔難搵，只係大街轉左入橫街 舖面貼滿介紹報導同相，聽講多人嘅時候係要排長龍，咁啱得幾個人唔洗排，即買即整，多謝$16 幾分鐘後就有得食嚕～ 雞蛋仔係真正外脆內軟，一粒粒可以啪得開，入面有少少軟冧冧，口感一流。 至於香味呢，食過筲箕灣低調高手有比較嘅就會覺得北角雞蛋仔味道少左份濃濃雞蛋香味，但剩計脆度甜度比其他無名嘅好食得多。 食完小食，跟住就去食正餐嚕～ 嚟到好評如潮嘅潮州打冷菜館－潮樂園，又聽聞晚飯時間係要排隊，不過我哋嚟到已經係過左晚飯時間，所以唔洗等位就有得坐 三個人唔太餓叫左唔算好多嘢，最主要畀朋友試下香港人鍾意嘅潮州味道 鹵水雙拼 $108 墨魚拼沙薑雞蘿蔔底。墨魚爽口，出奇地有其他舖頭少有嘅墨魚鬚，顏色無坊間咁螢光橙色，唔知係無落咁重手螢光染色定完全無落。雞唔太食到沙薑味，煮得啱啱好，雞肉唔痴牙。蘿蔔底，雖然無芽菜／豆腐底咁抵食，不過都好在煮得夠淋 鹵水豆腐小食 $30 豆腐有咬口，有好香濃鹵水味，點汁食一流～ 蝦籽魚蛋頭抽撈面 $45 台灣朋友想試香港的魚蛋（台灣叫魚丸），但嚟到之後佢更有興趣嘅係魚片，類似台灣嘅甜不辣，魚蛋同炸魚片爽口彈牙有魚香，唔係普通街市貨色，蘿蔔底，但煮過湯仲好味，可惜蘿蔔有少少老有根 特別點撈粗，係香港人鍾意嘅撈面配法，仲有一細碟頭抽係後面影唔到，蝦籽撈粗配頭抽係超正配搭，台灣朋友都讚！ 黃金煎蠔餅 $49 特別推介畀台灣朋友等佢試下同台灣蚵仔煎有咩唔同，雖然我有平時唔食貝殼類不過見到咁靚嘅蠔餅真係唔忍得手，煎得非常靚同脆，唔會油淋淋，蛋粉比例好，唔會為左節省成本多粉少蛋，而且蠔仔唔細仔，啖啖咬落去都有蠔肉，蠔肉唔潺放耐左少少都唔腥！超讚！ 利強記北角雞蛋仔 地址：北角英皇道492號 地圖：按我 營業時間 ：星期一至日 07:00-23:00 潮樂園 地址：北角和富道84-94號銀煇大廈地下4號舖 地圖：按我 營業時間 ：星期一至日 11:00-23:00 全文連英文版同步於： http://mattatsimplelife.blogspot.hk/2015/06/blog-post_24.html
