行深水埗福華街，由桂林街行到北河街嗰段，最啱就係掃平民美食。呢頭間間都係個體戶小本經營，款式多又抵食，仲要係內地風味為主——燒烤、水餃、湖南菜樣樣齊，小菜套餐通常一百蚊有找。今日點指兵兵，試下「福隆美食」。 個名係老土到爆，入到去亦唔好期望咩型格裝修，杯港式奶茶亦都唔合格。但福隆賣嘅係性價比，餐牌一揭，小菜五六十蚊起跳，最多都係七十蚊左右。你知啦，出面普通茶記一個套餐閒閒地八十幾蚊，福隆呢個價平足一大截。就算豪盡佢，叫個咖喱炒蟹，都只係百三蚊。 最緊要係，食物水準一啲都唔將貨就價。鑊氣足，味道濃，碟頭大，完全冇隱藏收費，話幾多就幾多。今日試佢哋嘅辣子海蝦，辣得過癮，數落足足有10隻蝦，野飲、例湯、主餐加埋都係$63。令人不禁懷疑自己是否穿越時空或者入左黑店，在今時今日，一個難以置信既晚餐價。 坐低嗰下，隔籬枱幾個阿叔一人一支大啤係度吹水，環境顯得有d喧嘩。不過佢座落地點或裝修風格已經反應左佢既定位。青輕仔女若來呢度撐檯腳似乎有d格格不入，佢屬於基層家庭同麻甩佬飲啤聚腳嘅好地方。想喺深水埗搵餐平靚正，呢間真係唔會呃你。
