個陣成日賣海膽廣告，搞到MW見到想食，有次M先生同我過佐敦去塔門仔海膽燒試下，叫得海膽燒都係主打海膽架啦 點知一黎到，出面已經多多人排隊，其實外邊都有座位，不過當日太熱，所以我地都係選擇坐室內，因為有冷氣！ 咁冇辦法，係出面等下都要，等下個時咪睇下張Menu諗定食咩先 與此同時都見到外邊有部電視，仲有好多有關雜誌宣傳，至知海膽燒係採用塔門紫海膽 仲有牆上貼滿菜式照，見到一心想試試呢到既海膽如何 終於到我地入座，裡面座位唔算好多，櫈亦係近年好流行既置物櫈，手上太多野亦可以放野落櫈裡面，不過實在有點逼 因為事先睇好食咩既關係，我地再三睇多次即刻迅速下單，只可惜當日既海膽薯蓉已賣光，至愛既薯蓉沒了，是不是太受歡迎的關係？ 呢到除左海膽菜，其實仲有唔同既串燒小食，主食都有幾款，如果同唔好食海膽既朋友黎都唔怕冇野岩食，所以我地除左點呢到既特色海膽菜，都試埋其他唔同小食，唔知水準又如何呢？ 我就叫左金菇牛肉卷($48)、脆炸墨魚咀($48)、海鮮炒烏冬($48)、塔門紫貝天葵($28) 金菇牛肉卷不得不提佢牛肉醃得好入味，而且牛肉一D都唔韌口，仲係好Juicy，啖啖都有肉汁，食牛肉最怕有筋又韌咬唔爛。 金菇份量多，我自己都好鍾意食金菇，而且又有益，平常自己下廚都常常煮金菇！呢到既金菇睇落我估都係同牛肉一齊醃，所以食落去一樣出味，牛肉又包到金菇實一實，每一舊食落都冇散開，最怕金菇散到周圍都係 脆炸墨魚咀大大粒，起初以為好似平常食到個D細粒墨魚咀，點知黎到係呢個樣，又可以試到新野！ 佢外身炸到好脆，而且好香口，應該有落到五香粉呢D調味，味道好出，就連同入面墨魚咀都一樣惹味，唔會只得外層有味內層啖茂茂，搞到食唔停口。 墨魚咀咬落有咬口，對於冇咩牙力既MW黎講都要D時間咀嚼，但是能接受的範圍。 海鮮炒烏冬入面有幾種海鮮：青口、帶子、蜆等等，面頭上仲有木魚絲，蔬菜當然少不了，有雜菜同雞脾菇！ 雞脾菇厚切，冇草青味，唔會太乾亦不太濕，再加埋雜菜好清新健康。青口兩隻冇沙，帶子軟林 塔門紫貝天葵，見到係燈泡裝，好可愛，又見個名咁有趣，一向鍾意挑戰周圍試所以就決定要點呢個 我仲走去問店員究竟呢個紫貝天葵係乜東東，佢地形容係好似利賓納咁，酸酸甜甜地，係涼茶黎。 心諗似利賓納應該都唔會伏得去邊啦，係咪？ 黎到一試，確實好似利賓納，但再飲真D，比利賓納更酸一點點，感覺有少少似涼茶咁，有些少寒涼，但確實不錯，不過都係有D飲唔慣 最後仲偷食左M先生既招牌海膽炒飯，炒飯粒粒都乾身 海膽雖然唔係好香個種，但入口甜滑，好想食多幾啖，不過M先生話我食得多佢冇得食，所以只好收口了
