事源係咁...本身35W及36W檢查時呀女都係胎位不正（即係個頭仲未轉落去），私家檢查個邊早就係32W時叫我book定日期開刀，但我自己又想等下先，公立醫院就建議係37W做「體外轉胎術」（用手係肚外面推令到個胎位變正，由於都有一定危險性，轉到就恭喜你繼續陀，轉唔到就book日子開刀或轉嘅中途有問題就要緊急開刀）2021年5月6日（36W）決定左要做「體外轉胎術」後，產檢後就會比一堆資料入院用包括：1. 入院通知書2. 入院須知3. 走佬袋清單（需要自己再加，唔係會執漏）4. 口水樽仔（驗新冠用）2021年5月11日（36W5D）1. 需要先去日間醫療中心交口水化驗（樽仔）2. 執定走佬袋（開刀預3日2夜嘅份量）2021年5月13日（37W）由前一日起（5月12日）開始已經不準飲食（怕如果真係需要開刀，打宮縮藥時會嘔）8:26am去入院登記處出示入院通知書+身份證明，對完資料後就會將你嘅通知書放入文件夾，跟住就可以上去7樓產前房（A7）8:33am入到去產前房填健康申報表，之後姑娘會磅重，有兩張同意書要簽：1.「剪會陰」（假設轉胎期間順產，就會幫你剪會陰）2.「初生嬰兒代謝篩查」（出生後就會係腳板底吉一針，染血睇下有無40幾種的代謝病，無事唔會通知，有事2個星期內通知）簽完之後就會訓上床量血壓同聽胎心，今次係兩個理工學生幫手量。量完血壓就會比套產前房衫你換（粉紅色）同埋去廁所驗尿，直接柯係張試紙到。之後就駁機聽胎心，都係個兩個理工學生去幫手，但事緣因為佢地「啪」漏左個制，所以部機響到好似爆炸咁，係咁dododo，最後要搵大粒護士黎教番佢地一次。 駁好就開始度胎心同數胎動，大約駁左半個鍾到，就有姑娘「種豆」，原來都真係幾痛，但姑娘已經好好手勢，一下就中。種完會幫你抽血。由於我已經相隔左11個鐘無食過野，為免我暈低，護士就幫我係粒豆到打「鹽水」，真係feel到有水入左去靜脈到，涼涼地。 9:30am醫生開始巡房，醫生會同你確認番係因咩事要入院，轉頭就會去照超聲波啦。等埋抽血報告就可以推肚肚。10:00am照超聲波時發現胎水對比起上個星期（36w）突然少左好多，醫生都唔建議推肚，直接開刀算~咁我就問醫生有無得揀邊日開刀（個時我都仲未係好知胎水減少嘅嚴重性）醫生話可以就即日開刀啦，唔係就聽日啦。我自己都打左個突，咁快~初初都無心理準備咁快，不知所措到會喊。平伏左之後，其實BB健康安全最緊要，拖多一日就危險多一日，交代好曬公司野就同醫生講即日開刀啦！*睇埋下集 -- 屯門醫院剖腹產（下）
