唔同懷孕階段都有唔同檢查要做，自費項目做定唔做屬個人選擇，之不過做咗會令自己安心啲無咁多擔心，唔怕一萬只怕萬一。第6-8週 - 私家照「閃閃」照超聲波睇下BB有無心跳、喺咪宮外孕、喺咪着床等等，有「閃閃」=過咗第一關。 第10-14週 - 公立度頸皮 + 私家做T21/Nifty檢查公立醫院會主動約你做度頸皮的時間，所以唔洗自己book，度頸皮係從BB頸皮厚度+媽媽年齡狀況去推算BB有唐氏嘅機率，約有85%準確率。假設屬高風險，醫院會建議做「抽絨毛」測試 (屬入侵性)，我會建議先做T21/Nifty (非入侵性) 測試減低對胎兒影響。按此了解「公立度頸皮」嘅流程T21/Nifty 屬自費項目，喺私家診所抽血，等5-7日就會有報告，價錢約$4,000-$6,000不等。除咗驗到唐氏仲可以驗到80幾種基因病，仲有可以早啲知道BB性別添。所以如果已經做咗T21/Nifty，其實可以唔做公立醫院嘅度頸皮，不過我想睇多次BB所以我公立私家兩邊都有去。 第20-22週 - 私家照結構即使做咗T21/Nifty，都要去照結構，呢個可以睇到非基因嘅缺陷，例如心臟問題、兔唇等等。照結構屬自費項目，約$4,000-$6,000不等，照個陣會幫你check手指腳指喺咪齊曬、頭圍&肚圍幾大、大脾骨幾長、心臟血流等等。我個時一踏入20w0d就去咗照結構，BB仲未發育得好成熟，而醫生個陣照到心臟話發現有血流唔到右邊心瓣，之後再約我2個星期後再去照，我就驚足2個星期，最後2個星期再去照就乜事都無，所以為免大家自己嚇自己，我會建議喺懷孕第21週尾-22週中先去做，唔好早到好似我咁。第27-35週 - 公立打百日咳疫苗打咗可以保障到BB頭2個月，所以我當時都無諗照打，而且仲要免費 (以前要自費打)。打完只喺手臂痺痺地，痺咗2日，建議打喺非慣用手。第35-38週 - 公立B鏈菌球測試公立醫院會幫你book日子去做B鏈測試，當日需要側身訓喺床到，姑娘就會用2枝棒，1枝「了」陰道，1枝「了」菊花，好快就做完，無咩事唔會打俾你。**坊間有啲醫療集團會有曬T21/Nifty + 照結構嘅Package，計落有機會平啲，因為我分開兩邊做，所以喺貴啲**搵私家婦科醫生記得要check佢喺邊間私家醫院到執業，喺私家醫院生仲要睇埋兒科醫生，所以要俾啲時間去做下功課**搵私家婦科醫生最好搵個會睇埋「產後檢查」，因為我嗰婦科醫生唔睇產後所以我要再額外搵個會睇產後嘅婦科醫生。不過我個婦科醫生好好，如果再生都會搵返佢，反正產後只睇一次
