我數學奇差，自從升中學後，數學科合格嘅次十隻手指數得晒，中三果年更加慘到拎G grade，收到成績表果時我都暗中驚嘆原來有grade G！以前每次上數學堂都好戰戰兢兢，好想聽得明但又真係唔識做，同學輕輕鄧梓鋒就做完，未落堂已經KO埋啲功課唔使拎返屋企做，我就做到嗌晒救命，做到凌晨喊晒口咁仲要俾我阿媽話我蠢，真心崩潰！內心有一下想返佢：「點解生到我咁蠢？」中一至中三幾乎放棄治療，要幾差有幾差！直到中四遇上個好老師，響佢嘅鼓勵下，終於俾返啲心機同努力讀數，做咗十年pass paper終於會考拎到個合格返嚟，算係光宗耀祖架喇！數學唔好，連唯一嘅商科Account 都drop埋，變成一個不折不扣嘅文科人！後來讀嘅科都係同數計完全不相關嘅科目，讀得輕鬆又快樂，數學？What's that? 其實想講，唔識計數有咩壞？處處會計算嘅人，可能或者大概條路會行得順利啲，冤枉路又真係可能行少啲，好似我做part time咁，見住好多part time仔做嘢會避重就輕，扮睇唔到以為最精！無錯，part time斷鐘計，出幾多力都係一樣人工，無花紅無勤工！但你唔好以為老細睇唔到先得架，真係咁蠢就係你做老細而唔係佢啦！我就係因為數口唔精，蝕底少少我唔識計，寧願做多好過做少。工作有時係會辛苦，但老闆、同事都鍾意我，仲會對我好，比我其他機會試新嘢。做過好幾份唔同嘅part time，識落唔少真心朋友，份份工都賺咗好多錢以外嘅經驗。相比起以為自己好識計數嘅人，我都唔知係佢識計數，定我識計數啦！ 學生拎59分已經俾well done嘅老師，你會知道佢幾有愛心！
