今晚冬至，我家媽子好強調冬大過年，好早已經吩咐我地預留今晚俾佢，一定要返屋企食飯。實際上我同哥哥都知道，媽媽得把口，冬至飯多數係無咩特別嘅一餐飯，好少話會特別好送。今年媽子hea嘅程度升級，竟然買咗一堆爭鮮壽司返嚟敷衍我地。但有一樣食物，一定係每年嘅冬至必食，就係湯圓啦!因為我同哥哥都唔係好鍾意食湯圓，所以真係一年食一次嘅食物。過咗咁年，年年都要食湯圓，於是我有個疑問：點解冬至要食湯圓？媽媽粗略解釋咗個原因：因為一家人，要團團圓圓，一年到尾都咁甜蜜丫嘛。雖然答案是行貨喇，但內心果一份情同埋對我地嘅重視係收到曬！ 有時好明白媽媽係想見多我地幾面，自覺人大咗好多時係你有你嘅生活、我有我嘅忙碌，大家少咗好多時間傾計食飯，有時就算返到屋企食飯，都係拿拿臨食完又返房做嘢，少咗好多關心......說到這裡，即刻好明白媽媽心底裡的堅持不是一頓飯，而是需要一份彼此關心。 今晚食飯有講有笑，講下生活、講下理想，提起媽媽一件幾年前的糗事，我仲迫佢講：我係豬兜！嘻嘻哈哈笑聲中享受著3蚊一件嘅爭鮮壽司。 暖在心頭嘅湯圓
