屯門壽司郎喺2月26日開幕， 第一日開幕盛況空前， 明知這些機會不是屬於我們的， 仍是去湊熱鬧。 雖然首日又係好難攞飛， 但好消息是全線因為炒飛事件已停止預約功能， 即是人人平等全港市民都要 walk-in！ 票就留俾願意付出時間的人。 今日已是開店的第5天， 本來對食到壽司郎不抱期望， 至多只係抱「下午取票食晚餐」嘅心態， 睇住個「香港壽司郎叫號系統」直播出門，點知屯門牛搭車短短半小時， 落車嘅先見到直播顯示暫停派籌， 唉......唯有放棄去第二度食午餐。 點知， 皇天不負有心「牛」， 食完午飯竟然見到直播又恢復派飛，到底個天係幫我定係玩我呢？ 去到門前撳一張票睇睇， 570號票， 號碼牌上竟然係嗌到565，只係要等5張！我諗係文迪剛好睇到恢復派票的一刻。 咁呢一刻如果係你， 你會唔會食多餐？ 答案當然係食多餐啦！只係等咗十分鐘就可以入座， 此刻感覺是人生太難， 入座太容易了( 其實只係運氣)。之前幾次路過佐敦店，只有一次Walk-in成功入座。 等我話你知點解咁容易， 文迪透過叫號系統直播做咗個小統計， 頭一小時有70桌入座， 一小時平均有70桌左右翻桌， 而中途又有人放飛機或遲到。 到下午差不多二時停止派飛， 因要處理之前嘅票號， 而到咗三點半左右又恢復派飛。 即係話清咗前面嘅票號， 店就會繼續派飛， 只要靠抓緊繼續派飛呢刻攞票， 就唔使苦苦等待了。順道一提店方似乎有補飛安排，見到有拎517號的客人過左幾十票號，都仲補到飛等多5張可入，未知是堅定流有待求証。 食飽飽突然要食多餐， 所以我倆叫得唔多壽司， 加上之前其實已經食過佐敦店， 少咗啲獵奇嘅心態， 就當食個下午茶好了。 屯門壽司郎個運作都幾好， 整個用餐體驗都好流暢， 侍應純熟迅速有禮抵讚！ 吧桌同卡位其實分別唔大， 都係可以拎迥轉線上的壽司， 不過卡位就坐得舒服啲適合四人以上。 首先待應會介紹一次如何點餐等等事項， 日本式的服務態度。 食完就會用部機scan下你食咗幾多碟， 限時60分鐘，所以翻桌速度算係好快的， 成日食唔到實在係因為佢太受歡迎， 同埋預約制度囉。 極上大吞拿魚腩(優惠價$12)屯門壽司郎， 當然要主攻新店限定壽司極上大吞拿魚腩，只售$12， 之前食佐敦店已經覺得最好食係拖囉， 已經唔記得咗佢原價有幾高， 佢個拖羅超新鮮肥美， 下午茶都食咗三碟。 海螺雙味($22) 海螺片特別厚身吃起來非常爽脆， 好重貝類的鮮味。 特選大吞拿魚腩($27)唔使講當然係拖羅好食啲， 無論油香或肥美度都只是no.2。 吞拿魚($12)都係嗰句優惠期間梗係食拖羅! 一分錢一分貨。 原條海鰻($27)平時覺得原條海鰻冇蒲燒海鰻咁惹味， 但這原條鰻魚吃起來很嫩， 口感很不錯。 厚切三文魚($17) 肥美度沒有很突出， 勝在新鮮， 都係拖羅好食啲。 日本產帆立貝($17) 比較失望， 薄切得嚟又欠鮮味。 飛魚子壽司($12) 冇咩特別， 同其他壽司店水準差唔多。 食咗午餐戰鬥力自然下降， 十碟壽司總共14件先至$190， 仲要攞咗兩張印花卡下次使用㖭， 又要食到勁好食的拖羅， 呢個下午茶都係值回票價， 最緊要幾乎唔使等呢。 至於屯門牛期唔期待壽司郎呢？ 當然期待吧(我估)。 屯門市中心食壽司嘅地方唔多， 呢個價位嘅就只係有元氣同埋峰壽司， 質素壽司郎好過元氣， 價錢又平過峰壽司少少。 加上屯市有好多商戶， 喺眾多壽司郎分店當中，呢個位置等位最唔辛苦， 因為有齊食買玩嘅元素！ 亦應該冇人咁傻山長水遠入到屯門同啲牛爭食， 最多就係得元朗國嘅居民來分一杯羹吧！ 以文迪今日嘅奇遇， 加上我的小小統計， 非假日要快速入座並非冇機會㗎， 最緊要就係留意壽司郎的叫號直播：香港壽司郎 屯門店 叫號系統 上次在佐敦壽司郎總店， 試咗唔同口味嘅壽司， 結論係壽司郎最好食係拖羅， 部分壽司係幾新鮮嘅， 有啲就水準平平， 勝在多幾抵食， 而且令人好懷念日本嗰啲迥轉平價壽司店， 如果排隊時間能夠短一啲， 咁性價比當然係好高啦！ 打小報告完畢！ 壽司郎．Sushiro．屯門店 地址：屯門屯順街1號屯門市廣場1期2樓2192-2193號舖電話：26887338官網：Facebook＊＊更多飲食、旅遊的博文，可加入我的專頁＊＊Facebook Instagram U Blog
