食食下飯要瞓低 曼姐而家3歲幾，完全將trouble 3發揮得淋漓盡致，曼曼媽日日都同佢博鬥，每日都同自己講今日要冷靜d，溫柔地同佢講，最難係同佢食飯，曼姐食飯永遠都唔可以坐定定係度，我成日都要叫佢返埋位，當你講第一次佢唔聽，我忍，講第二次，唔聽，深呼吸一下，再忍，但當第三次都唔聽，就忍無可忍，立即跳制再大聲怒吼，「你即刻同我坐低，係咪一定要我咁大聲同你講野」，然後佢就會學返我大聲同我講「唔係」，跟著就嬲爆爆坐返低，見到佢咁，我又會覺得自己唔岩，因為小朋友學野好快，我成日都同佢講「你即刻同我食飯」「你好立即同我過黎」「我數完一，二，三，我都唔見你點點點，我就會點點點」，其實佢已經深深咁印左係佢腦海入邊，有時佢都會用返呢種語氣黎同返我或者曼弟講，比如曼弟有時會企係張high chair，佢會同佢講「你好即刻同我坐好」或者直接大聲叫「你坐低」，有時我可能係廚房洗緊碗，我聽唔到佢叫我，佢會好大聲咁同我講「拿，我叫左你好多次架喇」當然呢句都係我口頭禪，有時自己都會係度反思，咁落去長遠對自己同曼姐都唔好，自己會勞氣死，曼姐就有樣學樣，而家我會學習用擁抱黎解決，每當自己想發嬲個度，我就同曼姐講，我地擁抱下先，佢會好受落，擁抱完喇，做人冷靜左，再同佢講你咁樣媽媽會唔開心，不如我地坐好好先，食完飯再玩，咁佢就會坐返低，雖然隔一陣佢都會起返身，但我相信，假以時日，我可以感化到佢。
