【滾得囍宮廷火鍋小炒】.政府剛剛宣佈６點禁堂食﹐大家小心身體！雖然未必Plan得切打邊爐﹐但而家可以bookmark定！希望大家不久既將來可以繼續日日食得好滋味！.個日放假好想食得豐富少少。A先生上網搵到間午市６８折既火鍋﹐師奶心態有得平梗係舉腳贊成GOGOGO😂餐廳位於北角站A出口行過少少就係﹐好方便呀！到達餐廳有啲驚喜，因為睇得出餐廳好花心思係裝修度。中國宮廷風﹐間隔私隱度好高。好肚餓既情況下見到咩都好想食。.一坐低見到枱面個爐有個鍋﹐鍋入面有兩套碗筷餐具雜亂咁放係入面﹐個時重心諗咩咁求其連餐具都唔放好。。。點知無幾耐有個職員過黎開爐－烚！餐！具！好震驚，可能我見識少😂不過當住客人面前高溫消毒，即時加好多分！畢竟疫情持續，會行多步既餐廳真係好值得表揚。.餐廳有一份聖旨放係枱，本身我仲以為係餐牌諗緊點解打極都打唔開，點知職員話原本係俾客打卡影相用。好搞笑！兩個人勁肚餓叫左一枱食物。. 📌順治特色卜卜蜆鍋 $198有卜卜蜆既鍋就一定好鮮甜！店家落左大量！係大量既蜆落去個湯底度。海鮮本身自己都帶鮮甜，大量就當然係鮮上加鮮。湯底咸味帶蒜﹐加埋蜆肉既鮮，唔可以界定佢係清既湯但一定係鮮味十足。蜆煮到開哂口就同A先生密密食都好似食唔完咁🤤. 📌清酒鮮牛肉 $168好深刻既鮮牛肉！我地異口同聲話下次一定因為佢而再黎滾得囍😍😍煮完出嚟嘅鮮牛肉個樣同平時嘅冇乜分別，點知一擺入口就好驚喜！因為一入口都有陣陣嘅清酒味撲鼻，成個口腔都充斥着清酒嘅香味。加埋每咬一啖清酒味就越嚟越強烈，濃烈嘅牛肉味加埋淡淡的清酒香，意想不到地咁夾呀😆如果你鍾意清酒味但平時飲酒覺得佢好濃，而家用清酒醃牛肉嗰種清酒香淡淡然，真係令人回味十足。. 📌手切頂級安格斯牛肉（大） $368手切牛肉其實有分大同細兩種選擇，不過師奶仔性格加上六八折，點計要個大都都係好似抵啲，差唔多價錢姐。一於要個大架啦。點知自己高估左自己個胃，大嘅份量真係好大！牛肉味濃、油花平均分布，肥瘦得宜。濃濃嘅牛肉味令人一啖接一啖咁食，份量大但都意猶未盡。. 📌滾得囍宮廷拼盤 $138呢個宮廷手打丸拼盤包括左五種嘅手打丸。味道其實都同出面差唔多，黑松露丸叫做比較深刻好食嘅， 彈牙得來又有滿滿嘅黑松露味仲有鮮甜墨魚丸味添！不過下次如果我再嚟食，就唔會再嗌拼盤啦！因為中肯啲講句，唔算係粒粒都好食，珍珠帶子墨魚丸偏腥、而有一粒叫做手打紫甘藍豬肉丸，食落去直頭嚇親我，羽衣甘藍食得多，浸味我都覺得幾好食，但當變咗粒丸之後熟咗嘅味道有啲苦澀味，入面紫色嘅樣子更加有啲嚇親。. 📌黑松露野菌餃４隻 $62黑松露粉絲嘅我自然見到黑松露嘅食物眼都發光啦，呢個野菌餃子皮唔算厚，入面嘅餡料有黑松露味之餘野菌味都好突出，係好食嘅！🤤.📌順德魚腐 $58順德漁腐就唔會有驚喜㗎啦，就係入貨嘅貨色囉。不過A先生想食就冇咩所謂啦！😂😂. 📌滾得囍蔬菜拼盤 $78本身都覺得蔬菜拼盤買$78好貴，但係嚟到我又覺得幾值得食。因為佢擺盤靚之餘啲菜仲好新鮮，好少見到咁翠綠色嘅蔬菜拼盤喺打邊爐餐廳出現，食得濃味嘅時候食返啲青菜清清咁中和下，係打邊爐必須㗎。.📌生根 $38生根就係平時屋企打邊爐街市買到個啲生根囉。鍾意食生根嘅朋友叫到係會開心嘅，係貴啲咁啦～. 📌厚切脆炸午餐肉 $68午餐肉都係有午餐肉味。睇得出佢啲貨色唔係cheap cheap嗰隻。佢將一盒切開再開半炸過，輕輕喺火鍋焯一焯，午餐肉嘅油脂感依然強烈，就算浸完湯都幾香口好食㗎。. 📌黃金雙拼（黃金炸魚皮＋黃金響鈴） $68黃金就即係鹹蛋黃。用鹹蛋黃嚟整魚皮響鈴真係冇得輸，炸到勁香勁脆，最緊要炸得夠脆，唔會入口成口油。香口嘢一定好食㗎 ！輕輕焯返佢幾秒，濕濕地咁食又別有一番滋味。.📌足料竹蔗茅根 $68食咁多嘢要下下火，呢渣竹蔗茅根唔算甜，應該唔係落咗好多糖，對於唔食太甜嘅我黎講就啱啱好啦。. 📌羅漢果菊花茶 $68一渣竹蔗茅根唔夠飲，臨尾叫多個羅漢果菊花茶。勁足料嘅感覺，似餐廳煲既？！又係唔算好甜，但羅漢果味勁重，怕怕地藥材味嘅我就唔啱啦，不過A先生就鍾意啦😂.呢間打邊爐我會再返嚟食㗎 ！因為雖然唔算平，但啲料食得出係新鮮，加埋個湯底都好好食！食完真心滿足！而且餐廳裝修間隔都舒服，枱與枱之間都叫有少少私人空間，相比起平時打邊爐啲比較污糟嘅感覺，呢度真係算幾乾淨㗎 ！加上有埋啲打卡位細心位，真係幾加分啊。如果午市時間嚟食就更Perfect，因為有六八折哈哈。.⭐必食推介: 清酒鮮牛肉🐂、卜卜蜆鍋🌊⭐評分: 8.5/10.✨ 滾得囍宮廷火鍋小炒 ✨📍 北角馬寶道33號寶馬花園1樓116-125號舖⏰ 1200-0000🏷 @滾得囍宮廷火鍋小炒 #kmcmfood #kmcmhk#kmcmfood #kmcmhk #hkfoodie #hkiger #hkblogger #hkfood #foodphotography #hkfoodlover #foodstagram #香港 #香港美食 #香港美食指南 #hkeat #hkig #北角美食 #滾得囍宮廷火鍋小炒 #kmcm北角
