未出發先興奮，撞正打風點算好？ 旅行打風都唔係第一次，記得2,3年前第一次去日本大阪都撞過打風，個時好彩係旅程中途發生，雖然都打正8號嘅風力，但留係安全既地方(酒店)，都無驚無險咁過左個風。 今次一個人，已經考慮過打風既問題，先選擇十月尾出發，十月尾都打風係咩玩法？時也命也~天氣預測一早測到出發前後會有風打緊黎，時刻都留意緊走向(話哂一個人小心啲好)，出發當日係星期五，星期一各國預報都話個風會係星期五、六左右登陸香港。登陸？！好似真係會打得成…. 首先Check下自己機票酒店保險條款，真係打風有冇得賠？買保險大家真係要小心，因為真係有保險唔包天氣問題而延誤既賠償，我個份，其實我都唔確定，因為我最後都冇CLAIM過~ 當星期一預計知道打風之後，已經即時打去航空公司(我坐HK Express)問可唔可以改機票，公司回覆因為未有內部通知，如果當時改就要收3百幾蚊改機票錢。而酒店我經expedia訂，條款係24小時前取消都可以免費退款(自己留意自己買左邊種了，有啲不可取消)，打去熱線問打風到時去唔到可唔可以取消，佢地答因為間間酒店做法不同，都要到時幫手爭取。值得一讚係，Expedia既CS好好，其實個時我都有啲小徬徨，十五十六咁，佢地都好有耐性同花時間了解同解釋俾我聽，感覺十分良好~ 如是者，其實星期一、二都無咩可以做到，不過就發現有個好朋友原來同一日出發旅行，我地仲講笑話，萬一DELAY，咪一齊係機場食個飯當Gathering囉J 星期三，各國預料個風都真係會登陸，並係星期五至六最接近香港…同日夜晚7點，HK Express出Notice星期五全日所有航班取消，乘客可以打去免費改機票。其實我都係夜晚8卦上佢地官網睇到，冇特別通知我的。用左兩部電話，一個幾鐘時間，終於成功打到俾一個女CS，CS係22:00左右既時間用好急速既語氣幫我Check機票，又話未必有唔知改唔改到，改到會SEND EMAIL通知e.t.c.，如是者我等左一晚，咩EMAIL都冇收過…而佢地Hotline好似服務到23:00。 第二朝一早，因為收唔到EMAIL覺得好奇怪，於是又用左45分鐘打去CS到，先知琴日位女CS其實冇幫我改機票….雖然都體諒佢地應該會超爆多人打去改野問野，但原來幫我改唔到個刻真係有啲燥…今次聽既係一位男CS， 好好彩呢個細心好多，幫我CHECK之餘仲提我其實咩咩班次好爆，唔好博，某某班次暫時仲鬆動啲e.t.c.。最後，由原本星期五出發，因為之後係星期六、日，啲機都唔夠位迫上，我改左星期一早上先出發，再遲一日返，落機即時返工，紅眼到極既一次旅行~ 酒店方面，幸好唔係24小時內改，可以免費更改J 記得要改埋旅遊保險日期，打上Hotline，佢會EMAIL份form俾你填，填好EMAIL返去，佢就會出個確認電郵免費幫你改，不過如果你縮短左行程，佢係唔會退返錢俾您架T.T 6日5夜，最終改到4日4夜，不過賺了一次打風應變既經驗…. 正能量黎睇，去得成唔駛取消行程，兼平左酒店錢添~…..
