致每個剛畢業既你，唔知大家搵到工未呢？有人話20+歲係人生一個好重要既轉捩點，由讀書時期既校園小社會走到去依個真正既大社會，對於未知既將來，唔知應該走邊條路同點樣走落去‧‧‧ 第一，真係要用腦喇！ 大學時期，雖則好多Project及考試Mid Term，但基本上都係「搬字過紙」，你只要有溫書，都唔會Fail (suppose)。你只要肯上網搵資料搵support，你份Assignment應該都唔會做得好差。 但去到社會，遇到事情同問題，你無得再係書本/ google上面搵答案，亦無得不停同人抱怨或Call Help。好多事，都要自己「獨立思考」，而呢一問題，相信已經唔係啲普通Project上既工事，更多既係人際關係、辦公室政治，同埋你自己對於前路既抉擇，好肯定你個腦會比起你讀書生捱用得多。 文迪都好想做個有腦既人。 並唔係一啲學業上，知識上既有腦；而係懂得就唔同事情唔同人，用唔同既語言同方法解決，咁樣至唔會咁易得罪人，為自己添加更多既煩惱。 第二，做事更果敢果斷！ 細個嗰陣，好多野都可能係屋企人決定；而係大學入面，Group project特別多，好多decision 都係made by team；甚至係日常生活當中，連買一個lunch都要思前顧後，望住餐牌勁耐都未揀到食咩，就會先睇下其他人食咩作參考。 出到黎做野，未必再可以比你慢慢諗。特別係啲好忙既Work Life，有時真係趕出黎食個Fast food就要返去做野，又或者直接嗌外賣係公司邊做邊食。而係決策上，都要變得更果斷，無得再係「是旦啦」「我無所謂阿」呢兩篤屁。 條路應該點行，都係要靠你自己揀，自己行落去。 第三，忘記了微笑 好多人都話，人越大，就唔記得左以前細個係點樣笑。隨住成長，生活壓力係不斷增多，漸漸就會唔記得左以前點解笑得開心，係咪我依家笑點高左？唔係，而係生活太疲憊，連笑都忘記了。 但無論生活幾full幾忙，千其唔好忘記微笑。笑容係互相感染既一件事，你諗下成間公司都無人笑，死氣沉沉，圖書館咁，你仲點樣堅持落去？試下用笑容，同同事們打開話題吧。 第四，老得特別快！ 其實由中學升到大學，呢一個轉捩點，大家都係會自己身體發現到變化。新陳代謝無以前細個咁好，體魄都係，唔單只容易肥，容易病，個肚腩仔，真係不論男、女都好容易比佢纏一世。 有時就會諗，早知就唔食咁多野，係未有肚腩之前就keep定先啦！ 香港好多工作都係office工，都係要坐。而文迪仲要返長短周，每個星期坐足6日既日子都唔好話唔痛苦阿！諗多諗，就會覺得以後真係要肥死了。「細個運動係為興趣，老左運動就係為健康。」既然工作環境無得強求，咁不如身體力行，係放工空餘時間行多兩步路，做多啲運動，好過無啦！ 雖然前路漫漫，但只要肯堅持，無野係做唔到既！ 年輕人，加油啦！
