第1篇正式既BLOG,想講一講生活。 係畢業之後,就覺得時間過得特別快。 回想起好多回憶仲係唔係好耐之前既事,轉眼間原來都咁多年喇! 人愈大,無論係外表上、心境上、行為上都會有一啲改變。 明明仲覺得自己係個細路女, 到到依家要正式投身社會喇,有一種唏噓又無奈既感覺湧上心頭。 ________________ 1:愈黎愈唔捱得餓 諗起以前中學呢,可能求其係小食部買個撈麵食就算, 可以講係對食無乜要求,連食少一兩餐其實都無乜所謂。 嗰陣仲後生,有Energy嘛! (利申:試過食一枝甜筒就當lunch,小朋友唔好模仿,否則就好似文迪我咁矮-_-) 依家? 定時定候就開始餓,唔食飯真係做唔到野! 亦都開始唔係好捱得肚餓-__- 當然,大個左,有啲收入,就可以食好少少。 唔好話Gathering啦,食個lunch都要OpenRice Search下附近有咩好野食,日日換下款。食得有要求左,更加識得去享受食物,欣賞食物,平時搵錢咁辛苦,梗係要對自己好啲嫁啦! ________________ 2:跌晒Walt 雖然文迪我都係20出頭,但深深明白體能同Energy跌晒Walt呢個悲慘事實。 相信大家都會有個疑問‧‧‧ 明明中學嗰時日日7點起身返學都無問題,點解依家就死屍咁痴住張床唔肯郁? 大學玩Ocamp 三晚唔訓都仲可以好有Energy咁揮曬熱血, 依家? 通一日頂,衰三日囉。 收工OT夜少少都已經叫苦連天,腰酸背痛。 身體跌Wait固之然係因為年紀,但另一個原因係「惰性」! 我會諗, 中學嗰陣有PE堂有陸運會,焗住你要做運動,就實精神好啲病少啲啦。 唔係話依家放棄運動放棄健康,而係當你每日既生活只有工作,加埋OT,有時星期六日都只係想好好休息下,或者簡簡單單約朋友出黎見個面就算。 因為太攰, 更加唔願抽時間出黎做運動-__- ________________ 3:開始想養生 「女人唔趁早補,好易老!」 除左護膚品、化妝品,會因為你既人工幾多而愈用愈好既牌子。 好重要既一點係,開始飲多左熱飲! 我自問都係個勁鍾意飲凍飲同汽水既人,有時唔舒服或者親戚到訪都仲可以唔知死咁飲。痛,咪食返幾粒必利痛囉! 不過年紀愈大,識得為自己既健康著想, 漸漸都覺得要開始養生,飲返多啲暖飲熱飲比較健康! 特別係Office凍冰冰又乾, 基本上個個Office Lady都會沖下熱飲 斟下暖水。 ________________ 4:珍惜朋友圈 由小學、中學、大學、到投身社會,係呢個過程入面,你一定識到唔少朋友。加埋啲Ocamp(s),Part time job(s),可能你電話入面個List都長到唔認得邊個打邊個。 (特別係我呢啲叫Mandy咁Common Name,應該招牌跌落黎都責死幾件-_-) 當你離開學生既行列,唔需要日日例行公事返學去見呢一大班同學仔,你就會發現啲Whatsapp Group 變得無咁活躍,唔通呢啲友誼只係建基於學校Projects上? 有時啲Group沉底沉得太耐,又唔係幾好意思再開話題。特別係你講完野,啲人十問九唔應 Read完就算,你再講野咪都係自討沒趣。 無論如何,相信你地身邊總係會有幾個好朋友 / 死黨 / 閨蜜 。 呢幾個人,可能係你由細識到大既同學;亦可以係大學入面一拍即合既好Groupmate;更可以係職場上聲聲相識既好Parnter; 朋友,無話識左幾耐幾長就特別感情好。 朋友,亦無需要多,只需要識到交心既就足夠了。 請珍惜依然留係你身邊聽你傾訴同互相分享既知己好友。 ________________ 5:開始擔心屋企人 呢一點都幾心酸。 幾年前都仲覺得Daddy Mammy睇落去好後生,好健康。 漸漸發現佢地年紀大喇, 眼睛無以前咁精,耳朵無以前咁靈, 更開始要注重多啲高血壓既都市病問題。 有時生活得太沖忙,都無好好咁望一望佢地。 到認真咁望佢地既容貌,睇到歲月既痕跡,睇到佢地慢慢變老,個心都特別痛。 雖然「身體健康」呢個賀語好老套, 但每一年既生日願望都一定會係呢個。 人成熟左,開始覺得無野比「身體健康」更重要。 ________________ 係呢個moment,覺得Twins首《幼稚園》真係好岩聽。 每一句歌詞都特別入肉。 還記得那一天 在那一天 初次上學堂 從前渡每分鐘 身邊也有 父母在旁 終於天與地 需要獨自往 兩手必需放 但我不想放 邊哭泣邊回望 然後到這一天 在這一天 走出世界 早告別學堂 人大了我應當 一早慣了 沒有護航 偏偏很幼稚 一有壞狀況 就會想歸去 父母親的堡壘 不管麻煩事幹 不要走 大鐘即使敲響 你別放開手 成年後 什麼都不可再 有成人遷就 不要走 前去在人群內 會磨鍊到夠 可見將來 日子總會有 順逆流 不過此時 獲得的愛顧 無私愛顧 未夠 ________________ 突然感性MODE左添。 希望各位都可以活在當下,珍惜每一日既日子,令每一日都變得更有意義。 :-P