香港美食多籮籮，我自己成日都捐窿捐罅搵冷門野食，Lunch dinner一定要食好西，但有時候3-4點肚餓，懶得滯廢事搵黎搵去，想快手食啲野既話，我就會揀總有一間係附近既大快活或者大家樂食個下午茶。雖然兩間都係大型連鎖式集團，但大家樂同大快活既下午茶都幾掂，價錢質素都OK，不過一山不能藏二虎，到底呢大快活同大家樂既下午茶決鬥，係我心目中邊間係優勝呢？即管睇下啦！呢一星期我都有去兩間舖食下午茶，作為一個專業既為食佬，食物既質素同價錢固然重要，但一間舖頭既裝修同服務都係重要既一環！首先講下裝修先，其實兩間係全港都有好多分店，我都好難一概而論，但佢地既裝修都各有特色，好似色調咁，大快活就用左年輕活力既橙色，大家樂就用左平易近人既黃色，兩間我都鍾意。裝修方面，兩間既座位舒適度、燈光柔和度都正常，坐得舒服自然食得開心。 而家食飯，去邊都好講求衛生同服務，大快活同大家樂既防疫措施都做到好足，入面所有員工都戴哂口罩，一入去就要量體溫都係常識吧！仲有個小經歷，就係我同一個朋友去大家樂食下午茶時，由於防疫關係，好多人自己一個單獨係坐一張枱，令到我地無位坐，我地唔想搭枱，又唔知點開口，大家樂姐姐就會主動幫我地去搵枱，幫手留意啲人幾時走，唔洗一陣就有位坐，值得一讚！ 講左咁耐，終於入正題，就係大快活同大家樂既下午茶比較啦！我食左咁多年，除非有新野想試，否則兩間我都幾乎係食指定下午茶餐：雞髀/西多士+紅豆冰，今次我都係主要比較呢2個下午茶餐。首先講左雞髀先，大快活下午茶有「蜜味燒雞髀」同埋「豉油皇雞髀」兩款選擇，可以配碗仔翅，仲有一個餐係配埋西多士+紅豆冰添。我多數係食豉油皇雞髀，唔知係分店問題定我黑仔，我次次去到蜜味燒雞髀都會賣哂，逼於無奈之下就食豉油皇。大細每次都會唔同，有次細隻到我要自己要求換過隻，不過好入味，肉質幾淋，都係一個出色既下午茶。唯一缺點就係比較油，我又鍾意揸住黎咬，所以次次都食到成口同成手油，有啲麻煩。 至於大家樂下午茶既雞髀係只有一種，就係「脆炸雞髀」，可以配牛油粟米或者蘋果薯仔沙津。 雞髀黎講，大家樂下午茶真係無得輸，我都算由細食到大，佢既味道依然咁好食，對佢有種不能形容既情意結！雖然係炸既，但咬落去係無咩油，揸住黎咬都唔會整污糟隻手，同埋肉質都好厚滑，炸皮外脆，雞肉內軟，每次去食雞髀份量都差唔多，食完再食個沙律成個感覺清爽哂。 講完雞髀就食講西多士同紅豆冰。大快活西多士係無切到，成舊咁上，份量都幾足，佢都算炸得幾脆，再加埋牛油同煉奶就very good，但缺點同雞髀一樣，都係好鬼油，食完會覺得超滯。紅豆冰方面，佢好似係用椰汁（?）加半杯紅豆再加冰，紅豆份量都好足，幾好味。 至於大家樂下午茶既西多士係切開一半咁上，份量同大快活差唔多，不過炸法好似有唔同，一樣有牛油同煉奶，同埋佢中間夾多左層花生醬，個味道層次即刻提昇左。紅豆冰方面，佢好似係用淡奶水（?），而當中既紅豆口感都有唔同既層次，佢地紅豆冰係用一半紅豆，一半紅豆沙溝均，唔怪得飲落係特別啲，炎炎夏日必飲。 總結，雞髀我就一定揀大家樂，至於西多士同紅豆冰，就睇你個人口味。我就鍾情大家樂下午茶多啲，始終由細食到大嘛～ #飲食 #香港 #美食 #下午茶 #餐廳
