越南峴港。會安6日嘅MaMa trip-會安古城+美食(Banh Mi Phung) 今篇主要介紹會安Hoi An, 錯，其實主要係介紹美食，RK佢嘅越南朋友介紹，黎到會安有幾間超好味嘅餐廳，一定要試下，咁去旅行搵好野食就一定嘅，於是我地係酒店check in 完放低行李，就急急去搵食喇。 會安好多古舊建築，房子矮矮，電燈柱，屋頂上都滿佈電線，馬路上勁多電單車，行人路上又泊滿電單車，我地由酒店行去搵食，都要係馬路邊穿插，由於今日都只係第二日到越南，小心行事，電話都唔敢成日拎係手，怕比人搶。 (其實全個行程都好安全嘅。) 我地今次會安第一餐食【越南小吃】Banh Mi Phung ,聽講話係越南最好吃的法國麵包。 哩間食Banh Mi嘅越南法包店，店舖唔係好大間，大大個招牌下面，放咗個玻璃櫃，擺滿晒各種餡料，有豬，牛，雞，仲有好多菜蔬，有啲似香港嘅車仔檔咁，門口外面就排晒長龍，好多遊客排隊買包。 本身我好鐘意食麵包，法國包一向都係我心頭好，而越南Banh Mi,我雖然未食過，但見到都流晒口水好想食。 RK負責排隊買包，我就入舖頭搵位，好好彩比我搵到個對正把大風扇嘅正位，剛剛由酒店行黎，雖然只係短短10分鐘腳程，但係3×度又熱又曬嘅高溫下，真係熱溶，哩個風扇位，真係好幫到手，坐低後就有人招呼可以直接點菜，原來堂食係唔需要係門口排隊買架，於是就示意RK入黎坐，安安落落點菜等食包。 打開餐牌，哩間號稱全越南最好吃的Banh Mi，連美國名廚Anthony Michael Bourdain都幫襯過。睇黎應該真係大有來頭的Banh Mi店，我地就勁期待喇(其實係勁肚餓)，點咗2款Banh Mi, 招牌餡包和豬肉餡包，再叫多碟蒸豬肉，加多2杯芒果沙冰。 (一個包大約HKD $7-8, 蒸豬肉$10，芒果沙冰$8) 上枱發現這個招牌Banh Mi 材料真係勁豐富，乜都有，好多肉和菜，個法包外脆肉軟，夾埋一齊真係好好好味，加埋杯芒果沙冰，真係絕配,一人食完半個招牌餡，再食半個豬肉餡，都仲想再食。 但其實我地仲有碟蒸豬肉未到，即蒸係要耐少少，食完個包就剛剛好到喇，諗住哩度banh mi出名啫，估唔到連哩個蒸豬肉都超好味，用米粉皮包住豬肉碎黎蒸，面頭加咗炸脆晒嘅乾葱，再夾埋一齊沾越南甜醋醬汁食，真係勁好味，我地清晒成碟，唔夠候太好味，就算好飽都要再叫多碟，都一樣清碟。 會安第一餐真係勁滿足，太好味了，加上超平好抵食，埋單都係幾十蚊，返到香港都仲好回味，好想再飛過黎食。。。。 有機會黎會安的朋友，一定要來試下，哩間全越南最好味嘅Phuong Banh Mi ！ 地址：2B Phần Cháu Trình -Hỏi Ăn 電話：0905.743.773
