越南峴港。會安6日嘅MaMa trip-酒店篇2.(Allegro Hoi An) Allegro hoi an little luxury hotel & spa 快板會安-小豪華spa飯店 (Suite Room $850) 離開咗Bana Hills, 我地就向越南嘅"會安古城"進發喇，"會安古城"被列入[世界文化遺產],一場黎到，當然要住近啲，方便夜遊，去欣賞掛滿燈籠嘅浪漫古城喇，由bana hills 坐車大約30分鐘就到，VND 40-50萬咁上下。 (官網上嘅酒店相，同真實係一樣嘅。) 當初book會安(Allegro)這一間酒店時，我首要揀近，最好腳程10分鐘之內，就行到去會安古城，其次係要有質數嘅，話晒都係放空trip嘛，對自己係要好啲嘅，再黎緊係要價錢又唔好太貴喇，因為之後嘅3晚重點酒店已經好貴。 係左揀右揀之下，比我搵到間，2018年頭剛剛開業，裝修，設施，地點，環境都非常好，有越南古典設計，特色燈籠裝修 ,有露台，房間大，浴室乾濕分離又有浴缸，價錢唔貴，員工服務仲要一流，個早餐又好好味，以每人HKD 425，有咁嘅質數，真係好抵好值，我同RK都話，下次再有機會去會安，我地一定會再次入住。 點擊圖片放大 +2 一入酒店，就有專人安排我地坐低，飲杯welcome drink降降溫先，再黎就慢慢介紹下酒店嘅設施，講解完因為仲有30分鐘先有房攞，我地就去四圍去影下相順便參觀下喇! 點擊圖片放大 +2 落到去Basement 見到有間SPA, 我地緊係要入去，睇下做個SPA咩價位先。。。一問之下，原來而家做massage有7折，咁當然要試下喇，我即時book咗4:30pm做個熱石massage。 除咗SPA酒店仲有GYM room, 瞓醒第二朝，我地都有去做咗1個鐘，一般基本跑步機，行山機係有嘅，但設施唔係話太多，不過我地做workout，有張yoga墊就ok，所以都無乜所謂， 做完就去食過豐富早餐，其實我地係咪增肥多啲。。。 哩間酒店嘅早餐超豐富, 沙律，熱食，果汁，芝士，粥，司壽，現場即煮有: 河粉，米卷，越式法包，蛋類，仲有大量水果，麵包。 以一間中小型嘅酒店，有咁嘅食物種類同質數，真係超出我想像。加分加分！ 點擊圖片放大 +9 用餐期間，酒店靚女supervisor HANA ，仲主動同我地傾計，了解下我地對酒店嘅感覺，又介紹下越南會安的特式，風土，開開心心傾咗成半個鐘，女人真係好傾得，最後仲叫我地check out 時一定要搵佢，佢想同我地say goodbye 喎！ 早餐位置對出就係泳池喇，泳池唔大，一個長型池，掛滿會安特色嘅燈籠，夜晚著晒燈真係幾靚架。細細地嘅泳池，曬太陽浸下水都唔錯架，不過我地聽日開始，大把機會游，所以我地就無享用過哩個泳池喇。 點擊圖片放大 +3 講返酒店入面個SPA,我揀咗做熱石Massage,裝修環境舒服，開始Massage前，會先同我地洗腳，之後就帶我入房，同我抹乾淨個身，就用油由肩開始推油到腳，再放熱石係我全身，用熱石幫我Massage,到位力度都好夠，之後好似又按下又推下，由於太舒服，我已經瞓著咗了。HKD 210，以越南黎講，可能唔算平，但因為會安係舊城區，要搵一間又乾淨又有質數仲要平，應該有啲難度. 期間，我都有係會安古城留意下，有無其他SPA massage, 搵到間小舖仔，按腳坐門口，感覺唔係好乾淨，價錢都只係平幾十蚊，所以係Allegro酒店嘅SPA massage, 真係好好，新淨又乾淨，舒服又唔貴，話晒係酒店入面喎，瞓都瞓得安心啲，仲要有7折(優惠唔知幾時完)，而且酒店仲好新，我推介如果黎會安，想massage可以黎試下，佢地都接受walkin 客嘅，但可能要預早book位。 點擊圖片放大 +3 總括哩間酒店，我地就好滿意喇，下次去會安，都一定會再入住。^0^ 下篇會介紹下會安古城+美食！yummy!
