越南峴港.會安6日-放空mama trip (16-21May2018) 準備篇-機票/簽証/電話卡/Grab call 車 今年3月,我和小時候就認識嘅好朋友RK,傾開講起,我們已經相識超過30年,大家都結婚生仔,但友情就算分隔半個地球,都依然維繫到,咁難得嘅友情,不如決定一齊掉低老公仔女,兩個閨密去旅行吖,就係咁就成就咗我地今次嘅mama trip!(相識時大家係幾歲嘅Girl,到而家都已經係人地MaMa喇),一個由香港飛去,一個由澳洲飛去,相約係越南峴港見喇! 廉航由香港可以直飛越南峴港,機票價錢真係由幾百到千幾不等,睇下你好唔好彩,搶到平飛囉,suki mama我就用咗8××,買到張來回香港-峴港6日的機票,哩個價錢係無包行李架,心諗越南應該無乜野好買,所以唔買行李都ok喇。 去越南唔係話飛就飛得,就算機票幾平,你都唔可以即日買,聽日飛。因為越南到現在,雖然香港直飛航班好多,但依然要辦理入境簽証。 辦理越南簽証,有3個方法: 1) 親身前往越南領事館(貴D,但可以直接過境) 2)係網上先申請簽証許可USD6,到達越南再辦理落地簽証USD25(平.慢.要排30-45mins) 3)經旅行社代辦簽証(最貴,懶人之選) 我就揀咗(2)自己上網申請簽証許可(www.vietnamvisapro.com),到越南機場再辦理入境visa,一落機踏入峴港機場,你就會遠遠見到有個櫃台寫住visa on arrival, 再望下長長嘅人龍,唔洗問人你都會知跟隊排就得,大約30mins就到我,交齊文件,相片,passport,就可以企埋一邊,等再叫你名時就可以交錢USD 25,拎番你本passport,個visa就攪掂。 拎完visa就可以直接過關,過關之後,就要買電話卡喇,因為黎緊哩幾日,無電話卡無得上網,會好唔方便,因為我要晚晚同個仔face chat 架。所以一過咗關,係左手邊就有好多間賣電話卡嘅公司,有幾個越南姐姐係度大叫,用英文/韓文講賣電話卡,我搵咗間網上話收得好嘅,要咗個最多日無限上網+電話嘅卡,價錢好抵USD8. 越南姐姐幫你換卡set好晒試過先比錢,哩張卡6日都接收得好好,最好係可以打電話,因為之後我要用黎call車,哩張打到電話嘅卡就用得著喇。 點擊圖片放大 卒之出到機場,會合咗RK,原本已經搵定包車,但無奈搵極都搵唔到個包車司機,所以,唯有試下自己call 車喇。 係越南最好嘅call 車apps係Grab,你只要係香港download定個apps,有張越南電話卡,就可以登記,set 好咗你想去嘅地點,就可以點到點去到目的地,基本上,每次我call車,都係1-2mins就有車,車到就對一對車牌,再望一望司機個樣對一對,無問題就上車,全程你唔洗出聲,佢都會車到你要去嘅目的地,超方便,又平,最重要係有晒樣,車種,車牌no,價錢,幾粒星,感覺好安心,哩個亦係我會再到越南玩嘅一個原因之一。 #廉航 #visa #Grab www.vietnamvisapro.com 如果想知越南峴港,會安,有乜好玩好食好住,記得比個like我,旅程完咗,遊記會繼續寫,keep 住follow喇。 Sukimama