話說從前係台北一間好正既燒肉店食過呢個飯,聽個名無咩特別,一食就不得了! 超香既蒜味同蝦鮮完全融入晒落個燉飯到,個飯有充足既水份而唔會好似粥咁,加埋蛋花簡直將成個飯搬上神枱! 個飯咁驚為天人,梗係自己整黎食下啦,唔通想食就飛轉台北咩 (那有錢) [2人份] 紅蔥頭切片 2粒 蝦(連殼) 1斤 水 1公升 蒜頭切碎 3瓣 白米 1米杯 蛋 2隻 胡椒粉 適量 鹽 適量 做法 1. 煲蝦湯先:蝦拆殼同頭留起,蝦肉去蝦腸洗乾淨待用。湯煲中火落油同紅蔥頭炒香,再落蝦頭蝦殼炒到有香味,加水,冚蓋中火煮滾隔渣待用。 2. 洗米。用另一個煲落油同蒜蓉炒香,落米再炒至有少少飯焦味,加蝦湯加到高過米既分量既1/3,冚蓋中火煮滾。 一定要睇住個火,唔好收乾水,見到收晒水就再加蝦湯! 懶人請睇3A,認真煮請睇3B 3A. 見到煲飯吸左大部分湯,但仍然見到有湯滾下滾下既時候,落蝦繼續煮至飯全熟。熄火落蛋等10秒再攪勻調味,食得 3B. (我欣賞你認真煮) 用平底鑊煎蝦,轉晒色落少少花雕酒加香味同僻腥味。等飯都煮好了,就落蝦、蛋同調味攪勻上碟開飯 如果蝦湯有淨,可以用黎整海鮮/蝦意粉個汁 #想知邊間燒肉舖問我 #錯晒重點 #充滿蛋白質 #真心好食 Follow me on Facebook: https://www.facebook.com/malucfooddiary/